काठमाडौँ । इटालीमा भएको राष्ट्रिय चुनावमा अति दक्षिणपन्थी ब्रदर्स अफ इटालीको गठबन्धनले बहुमत ल्याएको छ । यसको अध्यक्ष, जर्जिया मेलोनी, देशको नेतृत्व गर्ने पहिलो महिला हुने भएकी छन् । दोस्रो विश्वयुद्धपछि उनी पहिलो दक्षिणपन्थी प्रधानमन्त्री हुने छिन् ।
इटाली युरोपेली संघको संस्थापक सदस्य मात्र नभएर तेस्रो ठूलो अर्थतन्त्र पनि हो । हालै सम्पन्न निर्वाचनमा ६४ प्रतिशतले मात्रै मताधिकार प्रयोग गरेका थिए । यसमा मेलोनीले करिब २६ प्रतिशत मत पाएकी छन् ।
सरकार गठन हुन केही साता लाग्ने सम्भावना छ । विजयपछिको पहिलो सम्बोधनमा मेलोनीले भने, ‘हामीलाई जनताले देश चलाउने अवसर दिएको हो । हाम्रो सरकार इटालीका सबै जनताको लागि हुनेछ। हाम्रो उद्देश्य देशका जनतालाई संगठित गर्ने हो। देशले हामीलाई रोजेको छ । हामीले पहिले कहिल्यै धोका दिएका छैनौं, न त गर्ने नै छौँ ।’
सरकार गठनका लागि गठबन्धनबीच वार्ता सुरु भएको छ । राष्ट्रपति सर्जियो माटारेल्लाले मारियो ड्र्याग्चीलाई नयाँ सरकार गठन नभएसम्म कामचलाउको रूपमा काम गर्न आग्रह गरेका छन् । ड्र्याग्ची सरकारको पतनले निर्धारित समयभन्दा ६ महिना अगाडि निर्वाचन गराउन बाध्य पारेको थियो ।
ब्रदर्स अफ इटालीले २६ प्रतिशत मत पाएको छ भने डेमोक्रेटिक पार्टीले १९, फाइभ स्टार मुभमेन्टले १५।४२ प्रतिशत मत पाएको छ ।
