काठमाडौं । एकीकृत समाजवादीका अध्यक्ष माधवकुमार नेपालले एमालेलाई सरकारबाट किन निकालियो भन्ने विषयमा विश्वविद्यालयले अनुसन्धान गर्नुपर्ने बताएका छन् ।
सोमबार प्रतिनिधिसभामा प्रधानमन्त्री पुष्पकमल दाहाल प्रचण्डले विश्वासको मत लिन गरेको प्रस्तावका विषयमा आफ्नो धारणा राख्दै नेपालले एमाले आफैं सरकारबाट बाहिरिएको हो कि निकालिएको हो रु आफू अन्योलमा रहेको उल्लेख गर्दै विश्वविद्यालयलाई अनुुसन्धान गर्न दिनुपर्ने बताए ।
‘संसद् बैठकमा एमाले आफैं सरकारबाट बाहिरिएको, एमालेका मन्त्रीलाई घोक्रेठ्याक लगाएर निकालिएको भन्ने पनि सुनियो । खासमा के भएको हो, विश्वविद्यालयलाई यस विषयमा अनुसन्धान गर्न दिने कि,’ नेपालले भने, ‘पहिलो र दोस्रो दिनमै आकलन गरेको थिएँ। राजनीतिको नाडी हामीले पनि छामेका छौं। छामेरै यहाँ आइपुगेका हौं।’
यसरी छिटोछिटो नयाँ ढंगले सरकार गठन र पुनर्गठन हुने कुरा जनताले नसोचेको उनले बताए। नेपालको राजनीति तरल अवस्थामा रहेकाले यस्तो अवस्था आएको उल्लेख गरे।
त्यसअघि राष्ट्रिय स्वतन्त्र पार्टीका उपसभापति डीपी अर्यालले आफ्नो पार्टीका सभापति रवि लामिछानेलाई चौतर्फी घेराबन्दीमा पारिएको भन्दै गुनासो व्यक्त गरे । अरुले लखेट्दा एमाले अध्यक्ष केपी ओलीले साथ दिएको भन्दै उनले धन्यवाद दिए । उनले प्रधानमन्त्री प्रचण्डलाई विश्वासको मत दिने पनि बताए ।
राप्रपा अध्यक्ष राजेन्द्र लिङ्देनले भने प्रचण्डको आलोचना गरे । उनले आफूहरूले नयाँ गाडी दिए पनि प्रचण्ड पुरानै गाडीमा चलाउँछु भनेर हिँडेको बताए । पहिले यही गठबन्धनमा बस्ने भए किन गठबन्धन गरेको भन्दै उनले प्रश्न गरे ।
