वैदेशिक रोजगारीका लागि विभिन्न देश पठाइदिने भन्दै बेरोजगार युवायुवतीलाई ठगी गरेको आरोपमा प्रहरीले ४ जनालाई पक्राउ गरेको छ ।
काठमाण्डु उपत्यका अपराध अनुसन्धान कार्यालयका अनुसार पीडितहरूले दिएको जाहेरीका आधारमा उनीहरूलाई काठमाण्डु उपत्यकाका विभिन्न स्थानबाट पक्राउ गरी थप अनुसन्धान तथा कारबाहीका लागि वैदेशिक रोजगार विभाग ताहाचल पठाइएको हो ।
पक्राउ पर्नेमा काभ्रेपलाञ्चोकको रोशी गाउँपालिका–११ स्थायी घर भई हाल ललितपुर महानगरपालिका–१५ बस्ने ३२ वर्षीय वीरेन्द्र तामाङ, मकवानपुरको हेटौंडा उपमहानगरपालिका–६ स्थायी घर भई हाल काठमाण्डु महानगरपालिका–९ बस्ने ३८ वर्षीय कमलप्रसाद गौतम, अछामको ढकारी गाउँपालिका–४ स्थायी घर भई हाल काठमाण्डु महानगरपालिका–१४ बस्ने ३३ वर्षीय गणेशबहादुर बुढा र रामेछाप नगरपालिका–६ स्थायी घर भई हाल कागेश्वरी मनोहरा नगरपालिका–९ बस्ने ४४ वर्षीय बादी कुमार तामाङ रहेका छन् ।
प्रहरीका अनुसार वीरेन्द्र तामाङले बेलायत पठाइदिने भन्दै १ जना पीडितबाट ९ लाख रुपैयाँ लिएको आरोप छ । उनलाई ललितपुर महानगरपालिका–३ बाट पक्राउ गरिएको छ ।
त्यस्तै कमलप्रसाद गौतमले रोमानिया पठाइदिने भन्दै २ जना पीडितबाट १ लाख रुपैयाँ लिएको आरोप छ । उनलाई काठमाण्डु महानगरपालिका–९ बाट पक्राउ गरिएको प्रहरीले जनाएको छ ।
यस्तै गणेशबहादुर बुढाले अस्ट्रेलिया र क्यानडा पठाइदिने भन्दै २ जना पीडितबाट ३ लाख रुपैयाँ लिएको आरोपमा काठमाण्डु महानगरपालिका–१३ बाट पक्राउ परेका छन् ।
बादीकुमार तामाङले पोल्यान्ड पठाइदिने भन्दै ५ जना पीडितबाट २१ लाख ८९ हजार रुपैयाँ लिएको आरोप छ । उनलाई कागेश्वरी मनोहरा नगरपालिका–९ बाट पक्राउ गरिएको प्रहरीले जनाएको छ ।
प्रेस विज्ञप्तिअनुसार पक्राउ परेका ४ जनामाथि कुल ३३ लाख ८९ हजार रुपैयाँ ठगी गरेको आरोप छ भने यसबाट १० जना पीडित भएको देखिएको छ ।
प्रहरीले आकर्षक तलबको प्रलोभनमा परी वैदेशिक रोजगारीका नाममा रकम बुझाउनुअघि सम्बन्धित व्यक्ति तथा संस्थाको आधिकारिकता जाँच गर्न आग्रह गरेको छ ।
