काठमाडौँ – विवादास्पद ‘वाइड’ बलको निर्णय उल्ट्याइएपछि टी-२० विश्वविजेता भारत जापानविरुद्धको ऐतिहासिक तथा लज्जास्पद हारबाट बालबाल जोगिएको छ । पाँच ओभरमा छोट्याइएको टी-२० खेलमा भारतले जापानलाई २ रनले पराजित गरेको हो ।
जापानको सानो क्रिकेट मैदानमा टस हारेर पहिले ब्याटिङ गरेको भारतीय टोलीलाई जापानी बलरहरूले स्तब्ध पार्दै ५ ओभरमा ३२/४ रनमा रोकेका थिए । भारतका लागि कप्तान श्रेयस अय्यरले सर्वाधिक १६ रन बनाए । जापानका १७ वर्षीय स्पिनर चार्ली हारा-हिन्जेले १७ रन दिएर २ विकेट लिए, जसमा पहिलो बलमै भारतका विस्फोटक ओपनर अभिषेक शर्माको विकेट समावेश थियो ।
३३ रनको लक्ष्य पछ्याएको जापानलाई अन्तिम ओभरमा जितका लागि ८ रन आवश्यक थियो । अक्षर पटेलले गरेको अन्तिम ओभरमा बायाँहाते ब्याटर अलेक्ज्यान्डर सिराई-पातमोरले रिभर्स-स्वीप खेल्ने प्रयास गर्दा बल लेग साइडतर्फ गएको थियो । अम्पायरले सुरुमा त्यसलाई ‘वाइड’ घोषित गरे ।
अम्पायरको निर्णयप्रति बलर अक्षर पटेल र कप्तान श्रेयस अय्यरले असन्तुष्टि जनाउँदै मैदानमै विरोध गरे । भारतीय खेलाडीको दबाबपछि दुवै अम्पायरबीच छलफल भयो र अम्पायरले आफ्नो वाइडको निर्णय उल्ट्याए । यो निर्णयसँगै जापानलाई जितका लागि ५ बलमा ४ रनको सट्टा ६ बलमा ३ रन चाहिने स्थिति बन्यो ।
आइसिसीको नियमअनुसार कुनै ब्याटरले रिभर्स स्वीप वा स्थान परिवर्तन गरेर सट खेल्न खोजेमा पिचका दुवै तर्फलाई ‘अफ साइड’ मानिन्छ । नियमअनुसार अम्पायरको अन्तिम निर्णय सही भए तापनि निर्णय समीक्षा प्रणाली नभएको खेलमा खेलाडीको विरोधपछि अम्पायरले निर्णय बदलेको विषयलाई लिएर बहस सुरु भएको छ ।
अन्तिम ओभरमा राम्रो पुनरागमन गर्दै अक्षर पटेलले ७ रन मात्र दिएपछि जापान ३०/३ रनमा समेटियो र जितको नजिक पुगेर पनि २ रनले पराजित हुन पुग्यो ।
सेप्टेम्बर २४ देखि सुरु हुने पुरुष एसियाली खेलकुदको तयारीका लागि आयोजित यस खेलमा जापानले भारतविरुद्ध पहिलोपटक अन्तर्राष्ट्रिय टी-२० खेल खेलेको हो ।
