काठमाडौँ- प्यासिफिक एसिया ट्राभल एसोसिएसन (पाटा) ले भोटेकोशी बाढीका कारण केही उत्तरी क्षेत्रबाहेक नेपालका अन्य पर्यटकीय गन्तव्य सुरक्षित रहेको जनाउँदै विश्व समुदायलाई नेपाल भ्रमण जारी राख्न आग्रह गरेको छ।
पाटाका अध्यक्ष हेनरी ओह र पाटा फाउन्डेसनका अध्यक्ष एन्ड्रयुले जारी गरेको संयुक्त विज्ञप्तिमा रसुवा, लाङटाङ र भोटेकोशीका केही क्षेत्रमा क्षति पुगे पनि अधिकांश पर्यटकीय गन्तव्य सञ्चालनमा रहेको उल्लेख छ। बाढी प्रभावित क्षेत्रलाई आधार बनाएर समग्र नेपाल असुरक्षित रहेको गलत सन्देश प्रवाह नगर्न पाटाले पर्यटन व्यवसायी र सञ्चार माध्यमलाई अपिल गरेको छ।
बाढीका कारण स्थानीय बस्ती, सडक र पर्यटन पूर्वाधारमा असर परेको भए पनि काठमाडौँ, पोखरा, अन्नपूर्ण क्षेत्र, सगरमाथा, खुम्बु, चितवन, बर्दिया र लुम्बिनीलगायतका स्थानहरू सुरक्षित रहेको पाटाले जनाएको छ। देशका प्रमुख विमानस्थल र पर्यटन पूर्वाधारहरू सञ्चालनमा रहेकाले पर्यटकहरूलाई आफ्नो भ्रमण योजना रद्द नगर्न आग्रह गरिएको छ। पाटाले नेपाल भ्रमणको योजना बनाइरहेका यात्रुहरूलाई आधिकारिक स्रोतबाट जानकारी लिएर यात्रा तय गर्न सुझाव दिएको छ।
यसैबीच, पाटा फाउन्डेसनले बाढीबाट प्रभावित गाइड, चालक, भरिया तथा साना व्यवसायीहरूको जीविकोपार्जन पुनस्र्थापना गर्न ‘नेपाल टुरिजम रिकभरी फन्ड’ सञ्चालनमा ल्याउने घोषणा गरेको छ। पाटाले नेपालबारे सही र अद्यावधिक जानकारीका लागि नेपाल पर्यटन बोर्डको ‘नेपाल जाउँ’ सूचना प्रणाली प्रयोग गर्न सबैमा आग्रह गरेको छ।
