काठमाडौं । झट्ट हेर्दा शरीर फुलाएर हिँड्ने ‘बडिबिल्डर’जस्ता देखिने प्रमोद श्रेष्ठमाथि जिमको आवरणमा स्थानीयस्तरमा डर, त्रास र आतंक फैलाउने गरेको आरोप लागेको छ।
स्थानीयका अनुसार श्रेष्ठले ‘पावर फिटनेस’ नामको जिम सञ्चालन गर्दै आएका छन्। तर, जिम सञ्चालनसँगै उनको गतिविधिलाई लिएर स्थानीयमा असन्तुष्टि र भय बढ्दै गएको बताइएको छ।
स्थानीयका अनुसार श्रेष्ठ पूर्वसशस्त्र प्रहरी जवान (भगौडा) हुन्। उनी सशस्त्र प्रहरीबाट भागेर अर्थात् सेवामा नफर्किएर केही समय दुबईसमेत बसेको र पछि नेपाल फर्किएर जिम व्यवसायमा संलग्न भएको बताइन्छ।
शारीरिक रूपमा बलियो देखिने श्रेष्ठको जिममा युवाहरूको बाक्लो जमघट हुने गरेको स्थानीयको भनाइ छ। जिम राति करिब ९ बजेसम्म सञ्चालन हुने गरेको र त्यहाँ ठूलो आवाजमा संगीत बजाउने, होहल्ला गर्ने तथा वरपरका बासिन्दालाई नियमित रूपमा असहज बनाउने गरेको स्थानीयको गुनासो छ।
फिटनेसका लागि खोलिएको जिम रातिसम्म सञ्चालन हुँदा त्यसबाट निस्कने आवाज र गतिविधिले टोलको शान्त वातावरण प्रभावित हुने गरेको उनीहरू बताउँछन्।
त्यतिमात्र होइन, श्रेष्ठले जिम आसपास आफ्ना समूहका व्यक्तिहरू भेला पार्ने र उनीहरूको आडमा स्थानीयमाथि दबाब तथा त्रास सिर्जना गर्ने गरेको आरोपसमेत लागेको छ।
स्थानीयका अनुसार विभिन्न समूहका युवाहरूलाई जम्मा गरेर टोलमा आफ्नो प्रभाव देखाउने तथा विरोध गर्नेहरूलाई दबाबमा राख्ने प्रयास हुने गरेको छ।
केही नाम कहलिएका गुण्डा नाइकेहरूसँग श्रेष्ठको उठबस र निकट सम्बन्ध देखिएपछि स्थानीय झन् त्रसित बनेको बताउँछन्। उनीहरूसँगको संगतका कारण आफूहरूमाथि कुनै समस्या आउन सक्ने डर स्थानीयमा रहेको बताइन्छ। यही डरका कारण कतिपय स्थानीयले असन्तुष्टि हुँदाहुँदै पनि खुलेर उजुरी गर्न नसकेको उनीहरूको भनाइ छ।
स्थानीयका अनुसार श्रेष्ठले आफूभन्दा कमजोर ठानिएका व्यक्तिलाई हेप्ने तथा मधेश मूलका व्यक्तिहरूलाई लक्षित गरी अपमानजनक गालीगलौज गर्ने गरेको आरोपसमेत छ। सार्वजनिक रूपमा गालीगलौज र दुर्व्यवहार गर्ने प्रवृत्तिले टोलमा असहज र भयपूर्ण वातावरण सिर्जना भएको उनीहरूको भनाइ छ।
श्रेष्ठको गतिविधिबारे प्रहरीले समेत निगरानी बढाएको बताइएको छ। स्थानीयले जिम सञ्चालनको आवरणमा हुने सम्भावित आपराधिक गतिविधि, समूहगत दबाब, रातिको होहल्ला तथा सार्वजनिक शान्तिमा पर्ने असरबारे निष्पक्ष छानबिन गरी आवश्यक कारबाही गर्न माग गरेका छन्।
