काठमाडौं। नेपाल बिमा प्राधिकरणले सार्वजनिक गरेको पछिल्लो विवरणअनुसार बिमा कम्पनीले आर्थिक वर्ष २०८२/८३ असारसम्म १ खर्ब रुपैयाँ दाबी भुक्तानी गरेका छन्। तथ्यांकअनुसार बिमा कम्पनी (जीवन र निर्जीवन)बाट यो अवधिमा १ खर्ब १ अर्ब ३६ करोड १३ लाख रुपैयाँ बिमा दाबी भुक्तानी भएको हो।
प्राधिकरणका अनुसार बिमा दाबी भुक्तानी अघिल्लो आवको तुलनामा १३.३० प्रतिशतले बढी हो । बिमा कम्पनीले अघिल्लो आवमा ९१ अर्ब ६ करोड ८५ लाख रुपैयाँ दाबी भुक्तानी गरेको प्राधिकरणको तथ्यांक छ।
गत आर्थिक वर्षको चौथो त्रैमास अवधिमा जीवन बिमा कम्पनीको ४ लाख १९ हजार १३६ वटा दाबीबापत ६९ अर्ब ६४ करोड २३ लाख भुक्तानी भएको छ। यस्तो रकम अघिल्लो वर्ष ३ लाख ९१ हजार १३५ वटा दाबीको ६५ अर्ब ८० करोड ८९ लाख थियो।
समीक्षा अवधिमा निर्जीवन बिमा कम्पनीले १ लाख ६४ हजार १०१ वटा दाबीको ३१ अर्ब ७१ करोड ९० लाख भुक्तानी गरेका छन्। अघिल्लो वर्ष १ लाख ५० हजार ६३० वटा दाबीको २५ अर्ब २५ करोड ९६ लाख भुक्तानी गरेका थिए।
गत आर्थिक वर्षमा परेका दाबीको बिमा कम्पनीले अझै ५२ अर्ब ८ करोड १ लाख रुपैयाँ दाबी भुक्तानी गर्ने बाँकी प्राधिकरणको तथ्यांकमा उल्लेख छ। । बिमा कम्पनीले अझै २ लाख ५० हजार ३८१ दाबी भुक्तानी गर्ने बाँकी रहेको हो।
तथ्यांकअनुसार जीवन बिमा कम्पनीले १ लाख ४४ हजार १४४ वटा दाबीको ११ अर्ब ४ करोड ७५ लाख रुपैयाँ भुक्तानी गर्ने बाँकी छ।
गत आर्थिक वर्षमा निर्जीवन बिमा कम्पनीबाट १ लाख ६ हजार २३७ दाबी संख्याबापतको ४१ अर्ब ३ करोड २५ लाख रुपैयाँ भुक्तानी बाँकी छ। अघिल्लो वर्ष सोही अवधिमा ९६ हजार ३८१ वटा दाबीको २५ अर्ब ७ करोड ९२ लाख रुपैयाँ दाबी भुक्तानी बाँकी थियो।
