काठमाडौं । नेपाली कांग्रेसका नेता डा. शेखर कोइरालाले विराटनगरस्थित बीपी कोइरालाको जन्मघर (कोइराला निवास) मर्मत तथा संरक्षणका लागि चालु आर्थिक वर्ष २०८३/८४ को बजेटमा विनियोजन गरिएको २ करोड रुपैयाँ अन्य जनहितका क्षेत्रमा खर्च गर्न सरकारसँग आग्रह गरेका छन्।
संस्कृति, पर्यटन तथा नागरिक उड्डयन मन्त्रालयका सचिवलाई पत्र लेख्दै डा. कोइरालाले सरकारले कोइराला निवासको संरक्षणका लागि बजेट छुट्याएकोमा आभार व्यक्त गर्दै मुलुकको वर्तमान आर्थिक अवस्था, गरिबी र नागरिकका आधारभूत आवश्यकतालाई दृष्टिगत गर्दा उक्त बजेट स्वीकार गर्न नैतिक रूपमा असहज भएको बताएका छन्।
उहाँले सीमित सरकारी स्रोतसाधन आम नागरिकको जीवनस्तर सुधार, स्वास्थ्य, शिक्षा तथा अन्य अत्यावश्यक क्षेत्रमा परिचालन गर्नुपर्ने धारणा राख्दै विराटनगर महानगरपालिका–७ स्थित कोइराला निवासका लागि छुट्याइएको रकम बजेटमै फिर्ता लिन आग्रह गरेका छन्।
पत्रमा गत वर्ष ‘जेन–जी आन्दोलन’का क्रममा आगजनीबाट क्षतिग्रस्त भएको कोइराला निवास नेपालको लोकतान्त्रिक आन्दोलनको महत्वपूर्ण ऐतिहासिक सम्पदा भएको उल्लेख गरिएको छ। पिता कृष्णप्रसाद कोइरालाले करिब एक शताब्दीअघि निर्माण गरेको उक्त घर नेपाली राजनीतिक, बौद्धिक र सामाजिक चेतनाको प्रतीक रहेको पनि उनले बताएका छन्।
डा. कोइरालाले कृष्णप्रसाद कोइरालाले सुरु गरेको शैक्षिक जागरण र समाज रूपान्तरणको अभियानलाई बीपी कोइरालासहित परिवारले निरन्तरता दिएको उल्लेख गर्दै त्यसले लोकतान्त्रिक मूल्य, राष्ट्रियता र राजनीतिक चेतनाको विकासमा महत्वपूर्ण योगदान पुर्याएको बताएका छन्।
बीपी कोइरालाले जीवनभर आम नेपालीको गाँस, बास र कपासका लागि संघर्ष गरेको स्मरण गर्दै उहाँप्रति सच्चा सम्मान व्यक्त गर्ने सबैभन्दा उपयुक्त माध्यम जनताको हितलाई पहिलो प्राथमिकतामा राख्नु भएको डा. कोइरालाको भनाइ छ। त्यसैले कोइराला निवासका लागि छुट्याइएको बजेट जनहितका प्राथमिक क्षेत्रमा खर्च गर्न सरकारसँग उनले अनुरोध गरेका छन्।
