काठमाडौँ । ऊर्जा, जलस्रोत तथा सिँचाइमन्त्री विराजभक्त श्रेष्ठले राष्ट्रको समृद्धि, पूर्वाधार विकास र सार्वजनिक सेवाको गुणस्तर दक्ष, इमानदार तथा उत्तरदायी इञ्जिनियरको भूमिकामा निर्भर रहने बताएका छन्।
जल तथा ऊर्जा आयोगको सचिवालयअन्तर्गत जलस्रोत तथा ऊर्जा अनुसन्धान केन्द्रले सोमबार आयोजना गरेको नवप्रवेशी इञ्जिनियरहरूको अभिमुखीकरण कार्यक्रममा सम्बोधन गर्दै मन्त्री श्रेष्ठले सरकारी सेवामा प्रवेश गर्नु केवल रोजगारीको सुरुआत नभई राष्ट्र निर्माणको अभियानमा सहभागी हुने ऐतिहासिक अवसर भएको बताए।
उनले प्रत्येक निर्णय, प्राविधिक सुझाव र हस्ताक्षरले लाखौँ नागरिकको जीवनमा प्रत्यक्ष प्रभाव पार्ने भएकाले उच्च जिम्मेवारीबोध, पारदर्शिता र व्यावसायिक इमानदारीका साथ काम गर्नुपर्नेमा जोड दिए।
मन्त्री श्रेष्ठका अनुसार राष्ट्रको विकास, सभ्यता र समृद्धिको इतिहास इञ्जिनियरहरूको सिर्जनशीलता, अनुसन्धान, अनुशासन र अथक परिश्रमसँग जोडिएको छ। सडक, पुल, विद्युत् आयोजना, प्रसारण लाइन, जलाशय, सिँचाइ प्रणाली, खानेपानी पूर्वाधार, औद्योगिक संरचना तथा आधुनिक सहर निर्माणमा इञ्जिनियरहरूको दूरदृष्टि र दक्षताले महत्वपूर्ण भूमिका खेल्ने उनले बताए।
उनले राष्ट्रसेवामा ज्ञान र प्राविधिक दक्षतासँगै नैतिकता तथा चरित्रको पनि उत्तिकै महत्त्व हुने उल्लेख गर्दै कतिपय अवस्थामा प्राविधिक सीपभन्दा नैतिक साहस अझ बढी आवश्यक पर्ने धारणा राखे।
मन्त्री श्रेष्ठले देशले नयाँ पुस्ताका इञ्जिनियरबाट प्राविधिक दक्षतामात्र नभई नवीन सोच, सकारात्मक ऊर्जा, नेतृत्व क्षमता र परिणाममुखी कार्यशैलीको अपेक्षा गरेको भन्दै जिम्मेवारीपूर्ण ढंगले काम गर्न नवप्रवेशी इञ्जिनियरहरूलाई आग्रह गरे।
