काठमाडौं । प्रभु बैंकबाट पहुँचको दुरुपयोग गर्दै अर्वौको ऋण अपचलन भएको तथ्य बाहीर आएको छ । बैंकका प्रमुख कार्यकारी अधिकृत अशोक शेरचनसहित केही अधिकारीहरुले आफन्तको नाममा अर्वौं रुपैयाँ अपचलन गरेको प्रमाणसहित नेपाल प्रहरीको केन्द्रीय अनुसन्धान ब्यूरो (सीआईवी)मा उजुरी परेसँगै अपचलन प्रकरणको तथ्य बाहीर आएको हो ।
अहिले यो विषयमा सीआईबीले सुक्ष्म रुपमा अनुसन्धान शुरु गरेको छ । सीआईबीका एक अनुसन्धान अधिकारीका अनुसार सीईओ शेरचनले आफन्तका नाममा रहेको जानकी मेडिकल कलेजलाई पटक–पटक गरी २ अर्ब रुपैयाँभन्दा बढी कर्जा प्रवाह गरेको, चिरायु अस्पताललाई प्रवाह भएको कर्जा, अन्य केही कृत्रिम ऋणी खडा गरी बैंकबाट करोडौं ऋण दिएको र घाटामा रहेका केही संस्थालाई ऋणमाथि ऋण थुपारेकोलगायतका विषयमा अनुसन्धान भइरहेको छ ।
कहाँ पुग्यो अनुसन्धान ?
प्रहरी स्रोतका अनुसार दुइ महिना अघि नै सीआईवीमा प्रभु बैंकका विषयमा उजुरी पुगेको थियो । सीआईवीले तत्काल उजुरी माथि छानविन सुरु ग-यो । छानविनका क्रममा अर्वौं रुपैयाँ अपचनल भएको शंका लागेपछि सीआईवीले गत माघ १२ गते नै ऋणीसँग सम्बन्धी सम्पूर्ण कागजात पेस गर्न भन्दै बैंकलाई पत्र काटेको थियो । त्यसको केही दिन पछि प्रभु बैंकले सीआईबीले मागेका कर्जाका फाइलहरुसहित जवाफ पठाएको थियो ।
सीआईवीका एक अनुसन्धान अधिकारीले भने, ‘प्रभु बैंकका सीईओसहितका अधिकारीले ठूलो रकम अपचलन गरेको उजुरी परेसँगै हामीले फाइल मगाएर अनुसन्धान सुरु गरिसकेका छौं, अहिले अनुसन्धनका चरणहरु अघि बढेका छन्, सकेसम्म चाँडो नतीजा बाहिर आउने छ ।’ ती अधिकारले भने, ‘निष्पक्ष रुपमा अनुसन्धान भइरहेको छ, अब अनुसन्धान पुरा हुन्छ, कुनैपनि दोषी उम्कदैनन्, निर्दोष फस्दैनन् ।’
यता राष्ट्र बैंकले समेत कर्जा अपचलन भएको निष्कर्ष निकाल्दै २०७२ सालमै सीआईबीलाई थप अनुसन्धान गर्न लिखित सिफारिस नै गरेको थियो । तर प्रभु बैंक स्रोतका अनुसार त्यसयता पनि शेरचनले जानकी मेडिकल कलेजलाई अर्को कम्पनी खडा गरेर ऋण थप्दै आएका थिए ।
प्रभु बैंक स्रोतका अनुसार सीईओ शेरचनले शक्तिकेन्द्रको प्रयोग गरी पटक–पटक आफूमाथिको अनुसन्धान रोक्न सफल भइरहेका छन् । बैंकका अधिकारीहरुका अनुसार उनले राष्ट्रपति विद्यादेवी भण्डारीलगायत उच्च पदस्थ व्यक्ति सँग आफ्नो निकट सम्बन्ध रहेको समेत बताउँदै आएका छन् ।
राष्ट्र बैंकको नियम अनुसार बैंक तथा वित्तीय संस्थाका कार्यकारी प्रमुखदेखि सञ्चालकहरुले आफन्तका नाममा सञ्चालित संस्थालाई ऋण प्रवाह गर्न मिल्दैन ।तर, सीईओ शेरचनले राष्ट्र बैंकको नियमको धज्जी उडाउँदै घुमाउरो बाटो प्रयोग गरेर ऋणमाथि ऋण थुपारिरहेका छन् । उनको शैलीसँग केही बाहेक बैंकका कर्मचारी समेत रुष्ट छन् ।
