काठमाडौँ । नेपाली कांग्रेसका सभापति गगन थापाले सर्वदलीय बैठकमा सरकार र प्रधानमन्त्रीको अनुपस्थितिबारे प्रश्न उठाएका छन्।
राष्ट्रिय स्वतन्त्र पार्टी (रास्वपा) सभापति रवि लामिछानेले आह्वान गरेको सर्वदलीय बैठकमा सहभागी हुन पुगेका थापाले सुनसरी घटनाको समाधानका लागि सरकारको भूमिकामाथि प्रश्न गरेका हुन्।
उनले सुनसरी घटनाबारे छलफल गर्न सर्वदलीय बैठक आह्वान गरी सामूहिक पहल थालेकामा रास्वपा सभापति लामिछानेलाई धन्यवाद दिए।
थापाले भने, “यतिखेर सरकार के गर्दैछ, सरकार कहाँ छ? सरकार स्टाटसमै सीमित छ। सरकारले अरुलाई विश्वास गर्नुपर्छ।”
उनका अनुसार यस्तो अवस्थामा प्रधानमन्त्रीले तत्काल सर्वदलीय बैठक बोलाउने, राष्ट्रपतिसँग छलफल गर्ने तथा प्रदेश र स्थानीय सरकारसँग समन्वय गरेर साझा प्रयास अघि बढाउनुपर्ने थियो।
“विगतका विपत्तिका समयमा पनि राजनीतिक दलहरूले तिक्तता त्यागेर एकता प्रदर्शन गरेका थिए,” उनले भने।
थापाले सुनसरी घटना राज्यको कमजोरीको परिणाम भएको बताए। उनले कांग्रेसले घटनाबारे आन्तरिक रूपमा छानबिन गर्ने तर सरकारलाई अप्ठ्यारो पार्ने उद्देश्य नरहेको स्पष्ट पारे।
“यस्तो बेला पनि प्रधानमन्त्रीले भाउ खाएर बस्ने, ठालू बनेर बस्ने? यस्तो समयमा प्रधानमन्त्रीले सकारात्मक ढंगले काम गर्नुपर्छ,” उनले भने।
उनले पार्टीका जनप्रतिनिधि र नेताहरूलाई बैठक गरेर समस्या समाधानका लागि पहल गर्न निर्देशन दिइएको बताए। प्रभावित जिल्लामा यस्ता घटना दोहोरिन नदिन कांग्रेसले आफ्नो भूमिका निर्वाह गर्ने उनको भनाइ थियो।
रास्वपा सभापति लामिछानेले आह्वान गरेको सर्वदलीय बैठकमा प्रधानमन्त्री बालेन्द्र शाह र गृहमन्त्री सुदन गुरुङ अनुपस्थित छन्। यस्तै, नेकपा एमालेका अध्यक्ष केपी शर्मा ओली र श्रम संस्कृति पार्टीका अध्यक्ष हर्क साम्पाङ पनि बैठकमा सहभागी भएका छैनन्।
