तापक्रम बढेसँगै दक्षिण–पश्चिम युरोपमा डढेलोको जोखिम उच्च बनेपछि फ्रान्सको एट्लान्टिक तटीय क्षेत्रमा करिब चार हजार मानिसलाई मङ्गलबार सुरक्षित स्थानमा सारिएको छ । बोर्दोको पश्चिममा फैलिएको विशाल डढेलो नियन्त्रणमा अग्निनियन्त्रकले केही सफलता हासिल गरे पनि बढ्दो तापक्रम र घट्दो आद्र्रताले आगो पुनः फैलिन सक्ने जोखिम बढाएको अधिकारीले बताएका छन् ।
फ्रान्स र स्पेनमा फैलिएका डढेलोका कारण हालसम्म करिब तीन लाख ३० हजार मानिसलाई सुरक्षित स्थानमा सारिएको छ । स्पेनले यस वर्षको चौथो गर्मीको लहरको सामना गरिरहँदा त्यहाँका धेरै डढेलो अझै नियन्त्रणमा आउन सकेका छैनन् ।
फ्रान्समा अग्निनियन्त्रकले रातभरको प्रयासपछि गिरोन्ड क्षेत्रमा फैलिएको आगोलाई केही हदसम्म नियन्त्रणमा राखेका छन् । तटीय क्षेत्रका बालुवे ढिस्को नजिकको आगो नियन्त्रणमा आए पनि डढेलोले हालसम्म करिब ४२० वर्ग किलोमिटर क्षेत्र ओगटेको छ ।
अधिकारीले गिरोन्डको डढेलोको अवस्था स्थिर रहे पनि पूर्ण रूपमा नियन्त्रणमा नआएको बताएका छन् । तापक्रम बढ्दै र आद्र्रता घट्दै गएमा आगो पुनः फैलिन सक्ने चेतावनी दिइएको छ ।
गिरोन्ड क्षेत्रीय अधिकारीका अनुसार सावधानीस्वरूप लाकानाउ समुद्री तट र लाकानाउ ताल आसपासका शिविरस्थल, बिदा मनाउने गाउँ, पर्यटकीय आवास तथा मनोरञ्जन पार्कबाट मानिसहरूलाई सुरक्षित स्थानमा सारिएको हो ।
फ्रान्सको राष्ट्रिय अग्निनियन्त्रक महासङ्घका प्रवक्ता एरिक ब्रोकार्डीले तापक्रम बढ्ने पूर्वानुमानका बाबजुद डढेलो नियन्त्रणको प्रयास जारी राखिने बताउनुभयो ।
फ्रान्सको राष्ट्रिय मौसम सेवाले मङ्गलबार दिउँसोदेखि गिरोन्डमा तापसम्बन्धी पहेँलो चेतावनी जारी गरेको छ । त्यहाँको तापक्रम ३३ देखि ३५ डिग्री सेल्सियससम्म पुग्ने तथा हावाको गति बढ्न सक्ने पूर्वानुमान गरिएको छ ।
फ्रान्सको आन्तरिक मन्त्रालयका अनुसार यस वर्ष देशभर एक हजार १६० वर्ग किलोमिटरभन्दा बढी क्षेत्र डढेलोबाट प्रभावित भइसकेको छ ।
युरोपेली सङ्घको कोपर्निकस जलवायु सेवा तथा विश्व मौसम विज्ञान सङ्गठनका अनुसार युरोप विश्वमै सबैभन्दा तीव्र गतिमा तापक्रम बढिरहेको महादेश हो । अत्यधिक गर्मी र व्यापक सुख्खापनले फ्रान्स र स्पेनमा डढेलो फैलिन र तीव्र हुन सहयोग पु¥याएको कोपर्निकसले जनाएको छ ।
गिरोन्डको डढेलो गत सातादेखि तीव्र रूपमा फैलिएको हो । आगोले हालसम्म पेरिस सहरको क्षेत्रफलको करिब चार गुणा बराबर भू–भाग प्रभावित गरेको र करिब दुई लाख २० हजार मानिसलाई सुरक्षित स्थानमा सारिएको अधिकारीले बताएका छन् ।
आगो फैलिन नदिन सैन्य इन्जिनियर तथा वन डढेलो नियन्त्रण टोलीले मङ्गलबार पनि फायरब्रेक निर्माणको काम जारी राखेका छन् । अधिकारीका अनुसार हालसम्म १०३ किलोमिटर फायरब्रेक निर्माण भइसकेको छ । डढेलो नियन्त्रणका क्रममा ९३ अग्निनियन्त्रक घाइते भएका छन् ।
बोर्दोतर्फ जाने ए–६३ राजमार्गको केही भाग बन्द गरिएको छ भने बोर्दोको दक्षिणी क्षेत्रबाट टुलुज जाने रेलमार्गबाहेक अन्य रेल सेवा स्थगित गरिएको छ ।
ल्यान्डेसमा हजारौँ घर फर्किए
छिमेकी ल्यान्डेस क्षेत्रमा फैलिएको अर्को डढेलोको अवस्था नियन्त्रणमा आएपछि हजारौँ विस्थापितलाई घर फर्कन अनुमति दिइएको छ । उक्त डढेलोका कारण ३० हजारभन्दा बढी बासिन्दा तथा पर्यटक विस्थापित भएका थिए ।
फ्रान्सेली राष्ट्रपति इमानुएल म्याक्रोनले सोमबार साँझ आगो नियन्त्रणमा आएको बताउनुभएको थियो । क्षेत्रीय अधिकारीले पनि आगोको फैलावट रोकिएको र नयाँ आगलागी नभएको जनाएका छन् ।
सोमबार राति साङ्गुइनेट, पेरेन्टिस–एन–बोर्न र बिस्कारोसका केही भागका करिब १५ हजार मानिसलाई घर फर्कन अनुमति दिइएको थियो । यद्यपि, केही क्षेत्र अझै पहुँचबाहिर रहेका छन् ।
अधिकारीले ल्यान्डेसको डढेलो पूर्ण रूपमा निभिनसकेको भन्दै बाँकी तातो स्थान, हावा र सुख्खापनका कारण आगो पुनः फैलिन सक्ने चेतावनी दिएका छन् । त्यस क्षेत्रमा निगरानी तथा आगो निभाउने काम केही दिन वा हप्तासम्म जारी रहन सक्ने जनाइएको छ ।
स्पेनमा थप चुनौतीको सामना
स्पेनमा पनि सयौँ अग्निनियन्त्रकले सैन्य आपतकालीन टोली तथा पानी खसाल्ने विमानको सहयोगमा विभिन्न क्षेत्रमा फैलिएका ठूला डढेलो नियन्त्रणको प्रयास जारी राखेका छन् ।
स्पेनका गृहमन्त्री फर्नान्डो ग्रान्डे–मार्लास्काले रातभरको निरन्तर प्रयासले अवस्था केही सुधारिएको बताउनुभयो । तर, तापक्रम पुनः बढ्ने भएकाले आगामी दिनमा अवस्था बिग्रन सक्ने चेतावनी दिनुभयो ।
स्पेनको राष्ट्रिय मौसम सेवाका अनुसार देशले यस वर्षको चौथो गर्मीको लहरको सामना गर्दैछ । केही क्षेत्रमा तापक्रम ४० डिग्री सेल्सियसभन्दा माथि पुग्ने पूर्वानुमान गरिएको छ ।
अधिकारीका अनुसार स्पेनमा करिब ७९ हजार मानिसलाई सुरक्षित स्थानमा सारिएको छ भने थप ३० हजारलाई घरभित्रै बस्न आग्रह गरिएको छ । सरकारले डढेलोको प्रकोपका कारण राष्ट्रिय आपतकाल घोषणा गरेको छ ।
म्याड्रिडको पश्चिममा फैलिएका दुई ठूला डढेलो एकआपसमा मिसिन सक्ने सम्भावनाले अधिकारी चिन्तित छन् । पूर्वीप्रान्त कास्टेलोनमा लागेको अर्को डढेलोका कारण पनि ठूलो सङ्ख्यामा मानिसलाई सुरक्षित स्थानमा सारिएको छ ।
म्याड्रिडको पश्चिममा रहेको अभिला प्रान्तका पहाडी तथा ग्रामीण क्षेत्रमा फैलिएको डढेलो स्पेनको इतिहासमै सबैभन्दा ठूलो बनेको सरकारले जनाएको छ । उक्त डढेलोले ५०० वर्ग किलोमिटरभन्दा बढी क्षेत्र प्रभावित गरेको छ ।
