काठमाडौं । लगातारको वर्षापछि आएको पहिरो, लेदो र नदी कटानका कारण देशका विभिन्न जिल्लाका प्रमुख राजमार्ग तथा सडकखण्ड अवरुद्ध भएका छन्। नेपाल प्रहरीले केही सडक पूर्ण रूपमा बन्द भएको तथा केही राजमार्गमा रातिको समयमा मात्र सवारी सञ्चालनमा रोक लगाइएको जनाएको छ।
प्रहरीका अनुसार काभ्रेपलाञ्चोक–सिन्धुली जोड्ने बिपी राजमार्गमा सम्भावित बाढीको जोखिमलाई मध्यनजर गर्दै बेलुका ६ बजेदेखि बिहान ४ बजेसम्म सबै प्रकारका सवारीसाधन सञ्चालनमा रोक लगाइएको छ। बिहान ४ बजेदेखि बेलुका ६ बजेसम्म भने सवारी सञ्चालन गर्न दिइने व्यवस्था गरिएको छ।
त्यस्तै, मकवानपुरको कान्तिलोकपथमा वर्षायामको जोखिमका कारण बेलुका ५ बजेदेखि बिहान ५ बजेसम्म सबै प्रकारका सवारीसाधन सञ्चालनमा प्रतिबन्ध लगाइएको छ।
यसबीच, पहिरो र नदी कटानका कारण देशका विभिन्न जिल्लाका प्रमुख सडकहरू पूर्ण रूपमा अवरुद्ध भएका छन्। इलाम नगरपालिका–९ राजदुवालीस्थित मेची राजमार्गमा सडक हिलाम्मे भएपछि यातायात पूर्ण रूपमा बन्द भएको छ। उक्त क्षेत्रमा वैकल्पिक मार्ग प्रयोग गर्न प्रहरीले आग्रह गरेको छ।
सिन्धुपाल्चोकको अरनिको राजमार्गअन्तर्गत भोटेकोशी गाउँपालिका–४ जिरोकिलो र वडा नं. २ कोदारी क्षेत्रमा माथिबाट पहिरो, ढुंगा र लेदो खसेपछि सडक अवरुद्ध भएको छ।
दोलखाको लामासाँघु–रामेछाप सडकखण्डमा तामाकोशी गाउँपालिका–५ किर्नेटारमा सामाकोशी खोलाले सडक कटान गरेपछि यातायात बन्द भएको छ। सो क्षेत्रमा खिम्ती ग्रामीण विद्युत् सहकारी संस्थाको कार्यालय परिसर हुँदै वैकल्पिक मार्ग सञ्चालनमा ल्याइएको छ।
रसुवाको पासाङ ल्हामु राजमार्गअन्तर्गत उत्तरगया गाउँपालिका–५ खाल्टेमा त्रिशूली नदीले सडक कटान गर्दा सवारी आवागमन पूर्ण रूपमा ठप्प भएको छ।
यस्तै, मुगुको नाग्म–गमगडी सडकखण्ड, रोल्पाको शहीद राजमार्ग, पाल्पाको सिद्धार्थ राजमार्गअन्तर्गत सिद्धबाबा क्षेत्र, म्याग्दीको बेनी–जोमसोम सडक, काभ्रेपलाञ्चोकको बिपी राजमार्गको रोशी गाउँपालिका क्षेत्र, ललितपुरको कान्तिलोकपथ र लमजुङको बेँसीसहर–चामे–मनाङ सडकखण्डमा पनि पहिरोका कारण यातायात पूर्ण रूपमा अवरुद्ध भएको प्रहरीले जनाएको छ।
प्रहरीले वर्षाका कारण पहिरो र बाढीको जोखिम अझै कायम रहेकाले अत्यावश्यकबाहेक जोखिमपूर्ण सडकमा यात्रा नगर्न तथा यात्रा गर्नुअघि सम्बन्धित निकायबाट सडकको पछिल्लो अवस्थाबारे जानकारी लिन सर्वसाधारणलाई आग्रह गरेको छ।
