काठमाडौँ । परराष्ट्रमन्त्री शिशिर खनालले मुस्ताङमा युरेनियम उत्खननका लागि नेपाली सेना र अमेरिकी सेनाबीच कुनै सम्झौता भएको भन्ने सार्वजनिक चर्चामा सत्यता नभएको स्पष्ट गरेका छन्।
बुधबार राष्ट्रियसभाको बैठकमा सांसदहरूले उठाएको प्रश्नको जवाफ दिँदै मन्त्री खनालले मुस्ताङमा युरेनियम उत्खननका लागि कुनै पनि विदेशी पक्षसँग सहमति वा सम्झौता नगरिएको बताएका हुन्।
उनले, “मुस्ताङ जिल्लामा युरेनियम धातुको उत्खनन गर्न नेपाली सेना र अमेरिकी सेनाबीच सम्झौता भएको भन्ने सार्वजनिक चर्चामा कुनै सत्यता छैन,” भन्दै “खानी उत्खननसम्बन्धी विषयमा कसैसँग कुनै प्रकारको सहमति वा सम्झौता भएको छैन। यसबारे केही डिजिटल माध्यममा गरिएका दाबीलाई नेपाल सरकारका सम्बन्धित निकायले यसअघि नै खण्डन गरिसकेका छन्,” भने।
मन्त्री खनालले नेपालको संविधानको धारा २७९ मा प्राकृतिक स्रोत र त्यसको उपयोगसम्बन्धी गरिएको व्यवस्थाप्रति सरकार पूर्ण रूपमा प्रतिबद्ध रहेको पनि बताए।
उनले नेपालको असंलग्न परराष्ट्र नीति र पञ्चशीलको सिद्धान्तविपरीत हुने कुनै पनि सम्झौता सरकारबाट नहुने स्पष्ट गर्दै राष्ट्रिय हित र संवैधानिक व्यवस्थाअनुसार मात्रै निर्णय गरिने उल्लेख गरे।
