कास्की, कृषि, पर्यटन र मौलिक संस्कृतिको प्रवर्द्धन गर्ने उद्देश्यले पोखरामा २१औँ संस्करणको असारे रोपाइँ महोत्सव आयोजना गरिने भएको छ ।
पोखरा पर्यटन परिषद्ले यही असार १४ गते पोखरा महानगरपालिका–३० देउराली खोलाको छेउमा ‘पोखरा सबै मौसमका लागि’ नारासहित महोत्सव आयोजना गर्न लागेको हो । हरेक वर्ष राष्ट्रिय धान दिवसका अवसरमा असार १५ गते रोपाइँ महोत्सव गर्ने गरिए पनि यस वर्ष पूर्णिमा परेको र कृषकले हल गोरु नचलाउने परम्परा रहेकाले एक दिन अघि सारिएको हो ।
महोत्सवमार्फत स्वदेशी तथा विदेशी पर्यटकलाई नेपाली असारे रोपाइँ संस्कृतिको प्रत्यक्ष अनुभव गराउने लक्ष्य रहेको परिषद्ले जनाएको छ । महोत्सवबारे जानकारी दिन आज आयोजित पत्रकार सम्मेलनमा परिषद्का अध्यक्ष तारानाथ पहारीले भारतीयसहित विभिन्न मुलुकका पर्यटकको सहभागिता रहने अपेक्षा गरिएको बताउनुभयो । उहाँले परम्परागत धानखेती प्रणालीको संरक्षण, कृषिप्रति युवापुस्ताको आकर्षण अभिवृद्धि तथा कृषि पर्यटनको विकासका लागि महोत्सवलाई निरन्तरता दिइएको जानकारी दिनुभयो ।
“पोखरा भ्रमण वर्षलाई सफल बनाउने, गण्डकी प्रदेशमा आन्तरिक तथा बाह्य पर्यटन प्रवद्र्धन गर्ने तथा नयाँ पुस्तालाई मौलिक कृषि संस्कृतिसँग जोड्ने महोत्सवको उद्देश्य छ”, अध्यक्ष पहारीले भन्नुभयो ।
महोत्सवका संयोजक तथा परिषद्का महासचिव जीवनराज सापकोटाले विदेशी पर्यटकलाई धान रोपाइँ, हिलो खेल तथा ग्रामीण जीवनशैलीको अनुभव गराउने विशेष कार्यक्रम समावेश गरिएको बताउनुभयो । कृषि र पर्यटनलाई एकै सूत्रमा जोड्दै स्थानीय उत्पादन, संस्कृति र जीवनशैलीको प्रवद्र्धनमा महोत्सवले योगदान पु¥याउने उहाँको भनाइ छ ।
पोखरा–३० का वडाध्यक्ष दुर्गाप्रसाद सुवेदीले महोत्सवले लेखनाथ क्षेत्रसहित पोखराका अन्य पर्यटकीय गन्तव्यको प्रचारप्रसारमा सहयोग पुग्ने बताउनुभयो । पोखरा महानगरपालिकाको आर्थिक विकास महाशाखाका प्रमुख मनहर कडरियाले महोत्सवले स्थानीय आर्थिक गतिविधि र पर्यटन व्यवसायलाई चलायमान बनाउन मद्दत पुग्ने विश्वास व्यक्त गर्नुभयो ।
महोत्सवमा हिले फुटबल, पत्रकार हिले दौड, माछा समाउने प्रतियोगिता, धान रोपाइँ प्रतियोगिता, रस्साकस्सी, साउने प्रतियोगिता तथा विभिन्न सांस्कृतिक कार्यक्रम आयोजना गरिने आयोजकले जनाएको छ । दुई दशकभन्दा बढी समयदेखि सञ्चालन हुँदै आएको असारे रोपाइँ महोत्सव पोखराको कृषि संस्कृति तथा पर्यटन प्रवद्र्धनलाई जोड्ने विशिष्ट कार्यक्रमका रूपमा स्थापित हुँदै आएको छ । रोपाइँ महोत्सवमा आन्तरिकसहित विदेशी पर्यटक उल्लेख्य रुपमा सहभागी हुँदै आएका छन् ।
