जनमत पार्टीले प्रदेशहरूलाई पूर्ण स्वायत्तता प्रदान गर्नुपर्ने मागसहित सोमबार माइतीघरमा प्रदर्शन गरेको छ।
पार्टीले संघीयताको प्रभावकारी कार्यान्वयन, प्रदेश सरकारको अधिकार विस्तार तथा सीमान्तकृत समुदायका मुद्दालाई सम्बोधन गर्न विभिन्न माग राख्दै शान्तिपूर्ण विरोध प्रदर्शन गरेको हो।
प्रदर्शनमा सहभागी कार्यकर्ताहरूले प्रदेशहरूलाई पूर्ण स्वायत्तता घोषणा गर्न, कर्मचारी प्रशासन तथा स्थानीय तहलाई प्रदेश सरकार मातहत राख्न, जनसंख्याको आधारमा निर्वाचन क्षेत्र निर्धारण गर्न तथा प्रहरी प्रशासन र प्रमुख जिल्ला अधिकारीलाई प्रदेश सरकारअन्तर्गत ल्याउनुपर्ने माग गरेका छन्।
यस्तै, सरकारले घोषणा गरेको १२ लाख रोजगारी सिर्जना गर्ने प्रतिबद्धता कार्यान्वयन गर्न, नेपाली सेनामा मधेसी र थारु समुदायको समावेशी भर्ना सुनिश्चित गर्न तथा तराई–मधेस क्षेत्रको जनसंख्या अनुपातअनुसार बजेट विनियोजन गर्न पनि माग गरिएको छ।
प्रदर्शनकारीहरूले वैदेशिक रोजगारीसँग सम्बन्धित समस्या समाधान, किसानलाई मलखाद तथा सहुलियतपूर्ण ऋण उपलब्ध गराउने व्यवस्था, चुरे क्षेत्रको दोहन र अतिक्रमण नियन्त्रण तथा मधेसी, थारु, दलित, मुस्लिम, आदिवासी जनजाति, पिछडावर्ग, सुकुम्बासी र अल्पसंख्यक समुदायमाथि हुने विभेद र शोषण अन्त्य गर्न सरकारसँग आग्रह गरेका छन्।
जनमत पार्टीका उपाध्यक्ष तथा संगठन विभाग प्रमुख जयकान्त राउतले सरकारलाई आफ्नै प्रतिबद्धता स्मरण गराउने उद्देश्यले सांकेतिक प्रदर्शन गरिएको बताए। सत्तारुढ दल राष्ट्रिय स्वतन्त्र पार्टीले आफ्नो वाचापत्रमा उल्लेख गरेका विषयहरू कार्यान्वयनमा अपेक्षित प्रगति नदेखिएकाले सरकारको ध्यानाकर्षण गराउन कार्यक्रम आयोजना गरिएको उनको भनाइ छ।
राउतले मधेस तथा सीमान्तकृत समुदायका सरोकारप्रति सरकार पर्याप्त संवेदनशील नदेखिएको आरोप लगाउँदै प्रदेश स्वायत्तता, जनसंख्याको आधारमा बजेट विनियोजन तथा समावेशी नीतिको प्रभावकारी कार्यान्वयन आवश्यक रहेको बताए। हालै सार्वजनिक बजेटमा मधेस क्षेत्रको जनसंख्या र आवश्यकतालाई पर्याप्त रूपमा सम्बोधन नगरिएको उनको दाबी छ।
उनले सरकारलाई समयमै सचेत गराउन प्रदर्शन गरिएको उल्लेख गर्दै वाचाअनुसारका कार्यक्रम कार्यान्वयन गर्न आग्रह गरे।जनमत पार्टीले आफ्ना मागप्रति सरकारले चासो नदेखाए थप सशक्त आन्दोलनका कार्यक्रम घोषणा गर्ने चेतावनी समेत दिएको छ।
