काठमाडौं । नेपाली कांग्रेसका नेता डा. शेखर कोइराला समूहको बागमती प्रदेशस्तरीय भेला आज बस्दैछ । कोइरालाले आफ्नै समूहको संगठनात्मक छलफलका लागि भेला बोलाएका हुन् ।
बैठकमा निवर्तमान केन्द्रीय सदस्य, बहालवाला केन्द्रीय सदस्य (विशेष महाधिवेशनबाट निर्वाचित कार्यसमिति), सांसद, पूर्वसांसद, जिल्ला सभापति, पूर्वजिल्ला सभापति तथा क्षेत्रीय सभापतिहरूलाई आमन्त्रण गरिएको छ ।
कोइरालाको सचिवालयका अनुसार बैठक बिहान ८ बजेदेखि बालुवाटारस्थित ओपेरा होटलमा सुरु हुनेछ ।यसअघि बुधबार निवर्तमान कार्यवाहक सभापति पूर्णबहादुर खड्का समूहले पनि छुट्टै बैठक बसेर आन्तरिक छलफल गरेको थियो ।
विशेष महाधिवेशनपछि नेपाली कांग्रेसभित्र एकता कमजोर बनेको देखिन्छ । विभिन्न समूहबीच समन्वय नहुँदा पार्टीभित्र समानान्तर गतिविधि भइरहेका छन् ।
