काठमाडौं । राष्ट्रिय स्वतन्त्र पार्टी (रास्वपा) सभापति रवि लामिछानेले पार्टीका दुई सांसदहरुका विवादित अभिव्यक्ति र क्रियाकलापका सम्बन्धमा पहिलोपटक मुख खोलेका छन् । दुवै सांसदलाई पार्टीले कारवाही नगर्ने संकेत उनले गरे ।
सांसद खगेन्द्र सुनारले हिरासतभित्र एक दलित युवकको मृत्यू भएको घटनामा प्रहरीलाई ठाडो आरोप लगाएका थिए । उनले एसपीलाई घिसार्ने सार्वजनिक धम्कीसमेत दिएका थिए, जसको चर्को विरोध भइरहेको छ । अर्का सांसद विश्वराज पोखरेलले आफ्नै निर्वाचन क्षेत्रको एक विद्यालयमा पुगेर प्रधानाध्यापकलाई थर्काएका थिए । आफूलाई उचित सम्मान नगरेको भन्दै उनले प्रअलाई थर्काएको भिडिओ नेपाल प्रेसले सार्वजनिक गरेपछि भाइरल भएको थियो ।
यी दुवै विषयमा आज सञ्चारकर्मीसँग कुरा गर्दै लामिछानले दिएको जवाफ उनकै शब्दमाः
मैले मिडियामार्फत नै थाहा पाएको छु । सांसदहरुको अभिव्यक्तिको विषय आएको छ ।
खगेन्द्रजीको विषयमा दलित कैदीबन्दीको मृत्यू अलिकति शंकाष्पद देखियो भन्नुभएको छ । बर्षौंदेखि प्रताडित समुदायको आवाज अलिकति चर्को हुन्छ, झर्को मान्न पाईंदैन भनेर मैले भन्ने गरेको छु । उहाँहरुको पिडाको अभिव्यक्त सुन्नुपर्छ । तर मर्यादाका दायराहरु सबैलाई लागू हुन्छन्, त्यसलाई हेर्न बाँकी नै छ ।
विश्वराजजीको केसमा उहाँले सार्वजनिकरुपमा माफी माग्नुभएको छ । म के भन्छु भने जसलाई मालिक हुन छ, त्यसका लागि रास्वपा होइन । हामी सेवक हौं । त्यसको हेक्का हुनुपर्छ । मालिक हुन मन हुनेहरुलाई अरु नै ठाउँ होला । सबै साथीहरुले यसै चिजलाई ध्यानमा राख्नुपर्छ । उहाँले सार्वजनिकरुपमा माफी मागिसकेपछि सहज भयो । पार्टीको अनुशासन आयोग छ । हामी यसलाई हेर्दैछौं ।
