काठमाडौं । पूर्वराजा ज्ञानेन्द्र शाह शुक्रबार पोखरा भ्रमणमा पुगेका छन् ।
व्यक्तिगत भ्रमणका क्रममा पोखरा पुगेका उनलाई पोखरा अन्तर्राष्ट्रिय विमानस्थल बाहिर समर्थकहरूले भव्य स्वागत गरेका थिए । स्वागतका लागि उपस्थित समर्थकहरूले राष्ट्रिय झण्डा प्रदर्शन गर्दै जयजयकार गरेका थिए भने पञ्चेबाजा र पुष्पगुच्छासहित स्वागत गरिएको थियो ।
भ्रमणका क्रममा पूर्वराजा शाहले केही दिन पोखराका विभिन्न धार्मिक स्थलको अवलोकन गर्ने र स्थानीय नागरिक समाजका प्रतिनिधिहरूसँग भेटघाट गर्ने कार्यक्रम रहेको बताइएको छ ।
उनको भ्रमणलाई औपचारिक रूपमा व्यक्तिगत भनिए पनि स्थानीय स्तरमा यसले व्यापक चर्चा पाएको छ । पोखराको पर्यटन र समसामयिक राजनीतिक परिवेशबीच उनको आगमनलाई अर्थपूर्ण रूपमा हेरिएको छ ।
