काठमाडौं । लहान नगरपालिकामा कार्यरत कर्मचारी तथा शिक्षकले चार महिनादेखि तलब नपाउँदा आर्थिक संकट झेल्नुपरेको बताएका छन् । मङ्सिरदेखि तलब–भत्ता रोकिएपछि दैनिक घरखर्चदेखि बैंक ऋणको ब्याज तिर्नसमेत समस्या भएको उनीहरूको गुनासो छ ।
सङ्घीय मामिला तथा सामान्य प्रशासन मन्त्रालयले नगरपालिकाका सबै बैंक खाता रोक्का गरेपछि तलब वितरणसहित शैक्षिक र प्रशासनिक कामकाज प्रभावित भएको हो । यसले विद्यालयका नियमित कार्यक्रमसमेत अवरुद्ध बनेका छन् । एक विद्यालयका प्रधानाध्यापक नारायणप्रसाद साहका अनुसार तलब मात्रै होइन, पाठ्यपुस्तक, छात्रवृत्ति, दिवा खाजा र विद्यालय व्यवस्थापन अनुदानसमेत मङ्सिरयता रोकिएको छ । उनका अनुसार लामो समयदेखि भुक्तानी नहुँदा शिक्षक–कर्मचारीको जीविकोपार्जन नै संकटमा परेको छ ।
नगरप्रमुख महेशप्रसाद चौधरीले भने खाता रोक्का हुनुको मूल कारण प्रमुख प्रशासकीय अधिकृतको सरुवा विवाद र त्यससँग जोडिएको राजनीतिक दबाब रहेको बताएका छन् । उनका अनुसार नगरपालिकाको खाता बन्द राख्नुपर्ने ठोस कारण नभए पनि पूर्वाग्रहका कारण समस्या लम्बिएको हो । मन्त्रालयले निर्वाचनपछि खाता खोल्ने आश्वासन दिए पनि हालसम्म कार्यान्वयन नभएको उनको भनाइ छ ।
यो विवाद साविकका प्रमुख प्रशासकीय अधिकृत जयकान्त झाको सरुवा प्रकरणसँग जोडिएको छ । मन्त्रालयले उनको स्थानमा शिक्षातर्फका उपसचिव खिम भुजेललाई पठाउने तयारी गरेपछि नगरपालिकाले प्रशासनतर्फ अनुभवी उपसचिव माग गर्दै असहमति जनाएको थियो ।
झाले अवकाश हुन छ महिना मात्र बाँकी रहेको भन्दै सरुवा रोक्न प्रशासकीय अदालतमा मुद्दा दायर गरेका थिए । अदालतले फागुन ११ गते सरुवालाई यथास्थितिमा राख्न आदेश दिए पनि त्यसपछि पनि मन्त्रालयले नगरपालिकाको खाता फुकुवा नगरेको जनाइएको छ ।
तलब नपाएको विषयलाई लिएर कर्मचारीहरूले इलाका प्रशासन कार्यालयमार्फत प्रधानमन्त्री कार्यालय र मन्त्रालयमा ज्ञापनपत्र बुझाइसकेका छन् । उनीहरूले नयाँ वर्ष २०८३ र सिरुवा पर्वअघि तलब निकासा नभए कडा आन्दोलनमा उत्रिने चेतावनी दिएका छन् ।
