संखुवासभा – प्रतिनिधि सभा सदस्यका लागि राष्ट्रिय स्वतन्त्र पार्टी (रास्वपा)बाट उम्मेद्वारी दिएका मिङ्मा शेर्पाले आफू सत्ता होइन, समाधान खोज्न चुनावी मैदानमा आएको स्पष्ट पारेका छन्। हिमालको काखमा जन्मिएको नागरिकको हैसियतले जनताको हितलाई व्यक्तिगत महत्वाकांक्षाभन्दा माथि राख्ने प्रतिबद्धता व्यक्त गर्दै उनले उत्तरदायी, पारदर्शी र निःस्वार्थ नेतृत्वको आवश्यकता औंल्याए।
शेर्पाले आफ्नो जीवनका संघर्ष र हिमाली भेगको चुनौतीपूर्ण अनुभवले आफूलाई हिम्मत नहार्ने र सबैका लागि जिम्मेवार भएर अघि बढ्ने पाठ सिकाएको बताए। “जनताको कुरा केवल सुन्ने मात्र होइन, व्यवहारिक समाधान दिने नेतृत्व आवश्यक छ,” उनले भने, “न्याय, अधिकार र स्वाभिमानका सवालमा म दृढ र निर्भिक रूपमा उभिनेछु।”
उनले वर्तमान अवस्थामा युवाहरू रोजगारीका लागि विदेशिन बाध्य हुनु, किसानले उत्पादनको उचित मूल्य नपाउनु तथा नागरिकले आधारभूत सेवा र सुरक्षित पूर्वाधारको अभाव झेलिरहनु जस्ता समस्यालाई साझा राष्ट्रिय यथार्थको रूपमा चित्रित गरे। यी समस्याको समाधानमा अब ढिलाइ हुन नहुने उनको धारणा छ।
राजनीति पद वा प्रतिष्ठाको माध्यम नभई सेवा र उत्तरदायित्वको बाटो भएको उल्लेख गर्दै शेर्पाले स्वच्छ सोच, पारदर्शी प्रणाली र जनमुखी नीतिमार्फत संखुवासभाको समग्र विकासमा योगदान गर्ने अठोट व्यक्त गरे।
उनले आफ्नो सम्भावित विजयलाई व्यक्तिगत सफलता नभई संखुवासभाको आत्मसम्मान, एकता र दिगो विकासको जितका रूपमा व्याख्या गरे। “परिवर्तनलाई व्यवहारमा रूपान्तरण गर्ने समय आएको छ,” उनले भने, “हाम्रो भविष्य हामी स्वयं निर्माण गर्न सक्छौं।”
शेर्पाले मतदाता समक्ष विश्वास र साथको अपेक्षा गर्दै जनताको मतलाई साझा भविष्य निर्माणको आधार बनाउन आग्रह गरेका छन्।
