काठमाडौँ– पूर्वप्रधानन्यायाधीश सुशीला कार्कीले राष्ट्रपति विद्यादेवी भण्डारी राजा जस्तै भएको टिप्पणी गरेकी छिन् ।
बिहीबार काठमाडौँमा प्रेस काउन्सिल नेपाल, नेपाल कानुन समाजलगायत संस्थाले संयुक्त रूपमा आयोजना गरेको आमनिर्वाचन– २०२२ को मिडिया अनुगमन प्रतिवेदनसम्बन्धी राष्ट्रिय कार्यशाला गोष्ठीमा बोल्दै पूर्वप्रधानन्यायाधीश कार्कीले राष्ट्रपति विद्यादेवी भण्डारीको सवारीका कारण आफूले दुःख पाएको भन्दै असन्तुष्टि व्यक्त गरेकी हुन् ।
आयोगको कार्यक्रममा आउँदा राष्ट्रपतिको सवारीका कारण आफू लामो बाटो घुमेर आउनुपरेको उल्लेख गर्दै उनले राजाले ठिक गरेनन् भनेर आउने मान्छेहरू पनि राजा जस्तै भएको टिप्पणी गरिन् ।
पूर्वप्रधानन्यायाधीश कार्कीले पुराना प्रतिनिधिहरूको मानसिक विकास हुन नसकेको भन्दै गत निर्वाचनबाट युवाहरू आउनु सकारात्मक भएको बताइन् । राम्रा व्यक्तिलाई प्रतिनिधि बनाउन सकिएमा मुलुकले राम्रो बाटो पाउने उनको भनाइ थियो ।
उनले भनिन्, ‘निर्वाचन असल प्रतिनिधि छान्नका लागि हो । राम्रा प्रतिनिधिहरू छान्यौँ । जनताले रुचाएका व्यक्तिहरू छान्यौँ र त्यस्तो व्यक्तिहरू छानिएको अवस्थामा मुलुकले राम्रो बाटो पाउँछ ।’
निर्वाचनमा बेस्सरी पैसा खर्च गरेर निर्वाचनको अपव्याख्या गरेर त्यस्तो प्रतिनिधि आए भने निर्वाचनको कुनै अर्थ नरहने भन्दै उनले देशको शासन पनि त्यस्तै भएर जाने बताइन् ।
‘तर यस वर्षको निर्वाचनबाट के देखिएको छ भने हाम्रा नातिनी उमेरकाहरू अहिले देखा परे । थोरै रूपमा मुठीभरमा थोरै युवा र युवतीहरू देखापरेका छन्, अहिले । त्यो प्रयास भएको छ । पुराना प्रतिनिधिहरूको मानसिक विकास हुन नसकेको अवस्था छ । राष्ट्रपतिबाट मैले पनि दुःख पाएँ । कहाँबाट म आउनुपर्ने, सर्टकट नजिकमा आउनुपर्ने धेरै घुमेर आएको हुँ म पनि आज । राजाले ठिक गरेनन् भनेर आउने मान्छेहरू राजै जस्तो भए । यो मानसिकता जाने भनेको यही चुनावले हो’, उनले भनिन् ।
उनले गत निर्वाचन शान्तिपूर्ण रूपमा भएको पनि बताइन् । निर्वाचनबाट पुरानो मानसिकता फिल्टर हुँदै गएको भन्दै उनले नयाँ सोचाइ भएका कर्मठ युवा, युवतीहरू आगामी दिनमा अझ आउनुपर्ने बताइन् ।
