काठमाडौँ । जिल्ला प्रशासन कार्यालय काठमाडौँले आजदेखि काठमाडौँमा र्याली, जुलुस र प्रदर्शन जस्ता कार्यक्रम गर्न प्रतिबन्ध लगाएको छ। विभिन्न समूहले आयोजना गर्न लागेको भनिएका मोटरसाइकल र्याली तथा सभा–प्रदर्शनहरूमा रोक लगाइएको कार्यालयले जनाएको छ।
प्रशासनले गत भदौ २३ गतेको जेनजी आन्दोलनपछि भएका तोडफोड, आगजनी र सार्वजनिक तथा निजी सम्पत्तिमा पुगेको क्षतिको सन्दर्भ दिँदै शान्ति–सुरक्षा कायम राख्ने र सेवा प्रवाहलाई सुचारु राख्ने उद्देश्यले यस्तो निर्णय गरेको जनाएको छ।
कार्यालयले जारी गरेको सूचनामा भनिएको छ, “विभिन्न समूहहरूबाट हुने भनिएका र्याली, जुलुस, धर्ना, सभा र प्रदर्शनजस्ता गतिविधिले सुरक्षा चुनौती बढाउन सक्ने भएकाले कुनै पनि कार्यक्रम गर्न कसैलाई स्वीकृति प्रदान नगरिने निर्णय गरिएको छ।”
प्रशासनले स्थानीय प्रशासन ऐन २०२८ को दफा ६ को उपदफा ३(क) र प्रहरी ऐन २०१२ को दफा १९ बमोजिम काठमाडौँ उपत्यकाभित्र यस्ता गतिविधि रोक्ने निर्णय गरेको स्पष्ट पारेको छ।
