पोखरा, ११ माघ । गण्डकी प्रदेश सरकारका आर्थिक मामिला मन्त्री सीता कुमारी सुन्दासले वित्तीय संघीयतालाई सवल र प्रभावकारी रुपमा अगाडि वढाउने प्रतिवद्धता व्यक्त गर्नुभएको छ ।
मन्त्रालयमा बुधबार बिहान पदभार ग्रहण पछि आफ्ना भनाई राख्दै मन्त्री सुन्दासले त्यस्तो प्रतिवद्धता व्यक्त गर्नुभएको हो । गण्डकी प्रदेशमा आन्तरिक श्रोत वृद्धि गरी सवल र आत्मनिर्भर अर्थतन्त्रको विकास गर्ने तर्फ आफ्नो ध्यान केन्द्रित रहने भनाई उहाँको छ ।
स्थानीय तहबाट संकलन हुने साझा क्षेत्र भित्रका कर र शुल्कबाट प्राप्त हुने राजस्वमा वृद्धि गर्ने, र प्राप्त हुन नसकेको राजस्व श्रोतलाई प्रदेश सञ्चित कोषमा राख्ने व्यवस्था गरिने आश्वासन समेत उहाँले दिनुभएको छ ।
प्रशासनिक खर्चलाई मितव्ययी बनाउँदै पुँजीगत खर्च वृद्धि गर्न प्रभावकारी रुपमा समन्वय र सहजीकरण गरिने आयोजनाहरुको नियमित अनुगमन गरी पृष्ठपोषण लिने र फलोअप गरिरहने प्रतिवद्धता समेत उहाँको छ ।
राजस्व संकलन तथा सेवा प्रवाह अनलाईन प्रणालीबाट गर्दै जनताका कामलाई छिटो गरितो गर्नेतर्फ आफ्नो ध्यान केन्द्रित रहने भनाई उहाँले राख्नुभएको छ । भूमिको समुचित व्यवस्थापन तथा भूमि श्रोतको प्रभावकारी नक्साङ्कनमा जोड दिँदै गरिवी न्यूनीकरणमा प्रभावकारी कार्यक्रमहरु अगाडि ल्याइने बचन उहाँले दिनुभएको छ ।
प्रदेश भित्र रहेको सहकारीलाई नियमन गरी उनीहरुले दिने सेवालाई प्रभावकारी बनाउन जोड दिने र आर्थिक कार्यविधि एने नियमलाई कडाइका साथ कार्यान्वयन गर्ने प्रतिवद्धता उहाँको छ । पदभार ग्रहणसँगै उहाँले बजेट तर्जुमा सम्बन्धी गठित कमिटीका माईन्यूटमा हस्ताक्षेर समेत गर्नुभएको थियो ।
साथै मन्त्री सन्दासले आफूलाई मन्त्री पदसम्म पु¥याउन सहयोग गर्ने पार्टी अध्यक्ष केपी शर्मा ओली, निर्वाचन क्षेत्रका जनता, आफ्नी आमा र प्रदेशका मुख्यमन्त्री खगराज अधिकारीलाई धन्यवाद समेत दिनुभएको छ ।
