काठमाडौँ– कमिला प्रकृतिमा सबैभन्दा सामान्य किराहरु मध्येको एक हो ।
तपाइँले कमिला किन सधैँ एक लाइनमा (ताँती) बनाएर हिँड्छन् भन्ने कुराको विचार गर्नुभएको छ ? यदि छैन भने आज हामी यसको रहस्यबारे जानकारी गराउँदै छौँ ।
कमिलाको शरीरबाट ‘फिरोमोन’ नामक रसायन निस्कन्छ । कमिलाहरु जुन बाटो जान्छन्, त्यो बाटोमा उनीहरूले सो रसायन छोड्दै जान्छन् । उनीहरु खानाको खोजीका लागि टाढाटाढासम्म पनि पुग्ने गर्दछन् । खानाको खोजी गरेपछि उनीहरु आफू बस्ने प्वालतिर त्यही ‘फिरोमोन’को सहायताबाट फर्कने गर्दछन् ।
कमिलाको ताँतीमा भाले कमिला, पोथी कमिला, कामदार कमिला र रानी कमिला हुन्छन् ।
संसारका अन्टार्कटिका बाहेकका सबै देशमा कमिला पाइन्छन् । यसका १२ हजार प्रजातिहरू छन् ।
विश्वका सबैभन्दा विषालु कमिला ब्राजिलको अमेजनमा पाइन्छ । यो कमिलाले टोक्दा बन्दुकको एक गोली लागेजस्तै महसुस हुने बताइन्छ ।
सानो देखिने कमिलाले आफ्नो तौलभन्दा २० गुणा बढी तौल उठाउन सक्छ । कमिलाको कान हुँदैन, जमिनमा हुने कम्पनबाट यसले आवाजको महसुस गर्दछ ।
सबैभन्दा अचम्मको कुरा के छ भने कमिलाको आँखा स्वरुप मात्र हो । यिनीहरूले देख्न सक्दैनन् । कमिलाको शरीरमा फोक्सो पनि हुँदैन । श्वास प्रश्वासको लागि शरीरका ससाना छिद्र हुन्छन् ।
रानी कमिला र भाले कमिलाको पखेटा हुन्छ, तर कामदार कमिलाको पखेटा हुँदैन । रानी कमिला ३० वर्षसम्म बाँच्न सक्छ ।
कमिलाको शरीरको सबैभन्दा महत्वपूर्ण भाग घाँटी हो । कमिलाले मुखले च्यापेर कुनै वस्तु उठाउँदा त्यसको सम्पूर्ण भार घाँटीले थेग्ने काम गर्छ । घाँटीमा भएको नरम तन्तुहरू टाउको र जीउमा भएको कडा खोलसँग जोडिएको हुन्छ ।
वैज्ञानिकहरूका अनुसार विश्वमा कमिलाको संख्या दुई लाख अर्बभन्दा बढी रहेको छ । जुन विश्वमा रहेका हरेक मानिस बराबर २५ लाख भन्दा बढी हुन्छ ।
अर्थात् विश्वमा २० क्वाड्रिलियन कमिला भएको निष्कर्ष छ । यो भनेको २० अङ्कको पछाडि १५ वटा शून्य हो । गणितको भाषामा यो संख्या २० चतुर्भुज वा २० करोड लाख वा २० लाख करोड बिलियन हो ।
