काठमाडौँ— नेपालका युवाहरूको दैनिक जीवनमा सकारात्मक परिवर्तन सिर्जना गर्न उल्लेखनीय भूमिका खेलेको भन्दै गोर्खाका १७ बर्षीय शुभम देवकोटालाई डायना एवार्डबाट सम्मानित गरिएको छ ।
सामाजिक एवम् मानवीय क्षेत्रमा गरिने विशेष योगदानको कदरको लागि डायना पुरस्कार प्रदान गरिन्छ । यो पुरस्कार डायना, वेल्सको राजकुमारीको सम्झनामा स्थापित पुरस्कार हो । यो पुरस्कार यसै नाममा रहेको परोपकारी च्यारिटि संस्थाबाट प्रदान गरिन्छ । यस पुरस्कारलाई डायनाका दुवै छोराहरू द प्रिन्स अप वेल्स र ससेक्स ड्युकको सहयोग रहेको छ ।
शुभमले कोरोना महामारीको विषम समयमा स्विट्जरल्याडको दूतावास र लिडरसिप एकेडेमीसँग सहकार्य गर्दै सहयोग कोषका लागि नेपालमा बाढी पीडित र सीमान्तकृत विद्यार्थीहरूलाई राहत उपलब्ध गराउन २५० भन्दा बढी संस्थाहरूलाई सहयाेग गरेका थिए । यस्तै, उनले कर्णालीका ३०० विपन्न तथा गरिब विद्यार्थीलाई सहयोग गरेका थिए । उनले १३०० विद्यार्थीका लागि बूढानीलकण्ठ विद्यालयमा ४०० रुखको फलफूलको बगैँचा स्थापनामा सक्रियता देखाएका थिए । फोहोर व्यवस्थापन, जलवायु परिवर्तनका लागि सचेतना र स्वयंसेवी कार्यमा पनि उनले सक्रिय सहभागिता जनाएका थिए ।
यसै सन्दर्भमा डायना अवार्डकी सिइओ टेसी ओजो सिबिईले भनेकी छन्, ‘हामी युके र विश्वभरका डायना पुरस्कार प्राप्तकर्ताहरूलाई बधाई दिन्छौँ । आफ्नो पुस्ताका लागि परिवर्तनकारी भूमिका खेल्दै युवाहरूमा परिवर्तनको शक्ति भएकाले यिनले विश्वलाई बदल्न सक्छन् भन्ने विश्वास छ । हामीलाई विश्वास छ कि यो सम्मानले उनीहरूले अझ धेरै युवाहरूलाई उनीहरूको समुदायमा सक्रिय रूपमा संलग्न हुन र आफ्नै परिवर्तनका लागि यात्रा सुरु गर्न अझ प्रेरित गर्ने नै छ ।
पुरस्कार मनोनित गर्दा मनोनयनकर्ताले दृष्टि, सामाजिक प्रभाव, प्रेरणादायी अन्य विषय, युवा नेतृत्व र सेवाका क्षेत्र गरी पाँच क्षेत्र निर्धारण गरेका थिए । निर्णायक समूहमा २० जना रहेका थिए जसले युके र अन्तर्राष्ट्रिय रूपमा प्रत्येक क्षेत्र वा राष्ट्रको प्रतिनिधित्व गर्दछ । प्यानलमा रहेका तीन जना निर्णायकबाट युवाको योगदानको मूल्य बुझेर सामाजिक कार्यको गुणस्तर मापन गरी पुरस्कारका लागि सिफारिस गरिएको हो । प्रतिष्ठित पुरस्कार डायना विशेषतः जातीय समुदायका लागि समर्थन गर्ने, युवा परिवर्तनका लागि सार्वजनिक रूपमा मान्यता दिने, जीवनमा सकारात्मक परिवर्तनलाई बढावा दिने, विकास गर्ने, जोखिममा रहेका युवालाई सल्लाह दिने, युवाहरूको नेतृत्वमा बुलिङ विरोधीको अभियन्ता बन्ने कार्यक्रमका लागि सहयोगी भूमिका खेल्न सहयोग गर्नेलाई प्रदान गरिन्छ ।
