पोखरा, १५ कात्तिक । पोखरा महानगरपालिकाले नगर क्षेत्रभित्र प्रयोजन विपरीत संचालन हुदै आएका भूमिगत पार्किङ खाली गर्न सुरु गरेको छ । भूमिगत पार्किङमा व्यापारिक सामग्री राखेका घरधनीलाई पटक पटक त्यस्ता सामग्री हटाएर पार्किङको रुपमा प्रयोजन गर्न आग्रह गरेको भएपनि अटेर गरेपछि महानगरले मंगलबारदेखि डोजर लगाउन सुरु गरेको हो । सूचना नै दिएर भूमिगत पार्किङ खाली गर्न आग्रह गरिएको तर उनीहरुले दुई महिना वितिसक्दा पनि उक्त सूचनालाई लत्याएपछि डोजर लगाउन सुरु गरिएको जानकारी पोखरा महानगरपालिकाका प्रमुख धनराज आचार्यले दिनुभयो ।
भूमिगत पार्किङको लागि भनेर यस अघि महानगरपालिकाबाट कर छुट लिएर निर्माण गरिएका ति भवनहरु पार्किङको रुपमा नभई व्यापारिक प्रयोजनको लागि प्रयोग भएपछि महानगरले पटक पटक त्यस्ता सामग्री हटाउन आग्रह गर्दै आएको थियो । केही व्यापारीले यस अघि नै व्यापारिक सामग्री खाली गरेका छन् भने अटेर गर्नेको घरमा डोजर लगाइएको प्रमुख आचार्यले जानकारी दिनुभयो । भूमिगत पार्किङ धेरै मात्रामा चिप्लेढुंगा, महेन्द्रपुल, न्यूरोड, लेकसाइडमा रहेका छन् ।
अटेर गरेको भन्दै महानगरले पोखराको चिप्लेढुंगा स्थित आरके बिल्डिङ, महेन्द्रपुल स्थित गरिमा विकास वैंक भएको भवन लगायतका भवनमा डोजर लगाएको हो । महानगर क्षेत्रमा दुई सय वढी घरहरु अन्डरग्राउण्ड पार्किङ भएका भवनहरु रहेको जानकारी महानगरका प्रमुख आचार्यले दिनुभयो । ति पार्किङलाई पार्किङको रुपमा प्रयोग गर्न सक्यौ भने पोखराको सडकमा अव्यवस्थित पार्किर र ट्राफिक जामलाई केही हदसम्म सह जगर्न सकिने भनाई मेयर आचार्यको छ ।
