काठमाडौं । शुक्रबार उपउभामुखका लागि नेपाली कांग्रेस र राष्ट्रिय स्वतन्त्र पार्टीका दुईजना उम्मेदवारले मनोनयन दर्ता गराए ।
कांग्रेसका तर्फबाट मुक्ताकुमारी यादवले उम्मेदवारी दर्ता गराउँदा उनको प्रस्तावक र समर्थकमा कांग्रेस सहमहामन्त्री बद्री पाण्डेदेखि नेकपा एकीकृत समाजवादीका सांसद मेटमणि चौधरीसम्म रहेका छन् । सभामुखको उम्मेदवारी दर्ता गर्दा समेत कांग्रेस उम्मेदवारलाई नेकपा एकीकृत समाजवादीको समर्थन थियो ।
तर उपसभामुख चुनावसम्म आउँदा भने कांग्रेसलाई लोकतान्त्रिक समाजवादी पार्टीसम्मले समर्थन गरेका छन् । यसरी कांग्रेस, नेकपा एकीकृत समाजवादी र लोकतान्त्रिक समाजवादी पार्टीको विपक्षी गठबन्धन तयार भएको छ ।
सत्ता गठबन्धनमा रहेको तर मन्त्रालयको भागबण्डाले असन्तुष्ट बनेको जनता समाजवादी पार्टी समेत कांग्रेसको कित्तामा पुग्ने आंकलन यहीबिचमा शुरु भएको छ । जसपाले सभामुख चुनावमा समेत सत्तारुढ दलका उम्मेदवारलाई मत नदिने अपेक्षा गरिएको थियो । तर त्यसबेला भने एमाले उम्मेदवारका पक्षमा मतदान गरेको थियो । अहिले भने परिस्थिती फेरिने देखिएको छ ।
सत्तारुढ गठबन्धनमै रहेको जसपादेखि जनमत पार्टीसम्म मन्त्रालय भागबण्डाको विषयले असन्ुतष्ट देखिन्छ । सत्तारुढ दलभित्रै असन्तुष्टिका स्वर सुनिन थालेका बेला कांग्रेसले भने विपक्षी गठबन्धन बनाएर सरकारमाथि दबाब बढाउने रणनीति लिएको देखिन्छ ।
सरकालाई विश्वासको मत दिएको कांग्रेस र नेकपा एकीकृत समाजवादी प्रतिपक्षमै बस्ने स्पष्ट पारेका छन् । तर जसपा भने अहिलेसम्म सत्तापक्षमै रहने बताइरहेको छ । तर परिस्थिती फेरिदा भने जसपाले सरकारलाई दिएको समर्थन समेत फिर्ता लिने नेताहरु बताउँछन् । यसले कांग्रेसले नेतृत्व गर्न खोजेको विपक्षी गठबन्धन मजबुत बन्ने समेत देखिएको छ ।
