काठमाडौँ– पाकिस्तानको दक्षिण वजिरिस्तान क्षेत्रमा दण्डहीनता मौलाएको भन्दै व्यापक सरकारी विरोधी प्रदर्शन भएको छ । पाकिस्तान सरकारले उक्त क्षेत्रमा व्याप्त आतंकवाद, अपहरण, हत्या, फिरौती, चन्दा संकलनजस्ता गतिविधि नियन्त्रण गर्न नसकेको भन्दै प्रदर्शनको आयोजना गरिएको हो ।
प्रदर्शनकारीहरु वाना अङ्गुर अड्डा रोड, वाना ताङ्क रोड, वाना राजमाक रोडजस्ता सडकमा सरकार विरोधी नारा लगाउँदै प्रदर्शनमा उत्रेका हुन् । प्रदर्शनमा हजारौँ स्थानीयबासी, मजदुर, विद्यार्थी, नागरिक अगुवा, चिकित्सक, कानून व्यवसायी, सामाजिक अभियन्ता र अधिकांश राजनीतिक दलका कार्यकर्ता समेत सहभागी छन् ।
पाकिस्तानबाट प्रकाशित हुने द न्युज पाकिस्तान अखबारको अनलाइन संस्करणले जनाएअनुसार प्रदर्शनकारीले आफ्ना माग पूरा नभएको खण्डमा आन्दोलनलाई अझ तीव्र बनाउने चेतावनी समेत दिएका छन् । प्रदर्शनकारीले सरकारसमक्ष १० बुँदे माग अघि सारेको पाकिस्तानी सञ्चारमाध्यमले जनाएका छन् ।
पाकिस्तानको खैबर पख्तुनख्वा प्रान्तमा पर्ने दक्षिण वजिरिस्तानमा निकै लामो समयदेखि आतंकवाद, गैरन्यायिक हत्या, अपहरण र अन्य जघन्य अपराधका घटना हुँदै आएको बताइन्छ ।
अपराध र आतंकवाद नियन्त्रण गर्न सरकार असफल भएसँगै आफूहरु प्रदर्शनमा उत्रिन बाध्य भएको प्रदर्शनकारीलाई उद्धृत गर्दै द न्युज पाकिस्तानले जनाएको छ । प्रदर्शनका कारण वाना सहरका बजार, पसल, होटल, पेट्रोल पम्प ठप्प पारिएका छन् ।
