पोखरा, १ माघ । पोखराको सेती खोंचमा आइतबार बिहान भएको विमान दुर्घटनाबाट ३६ जनाको शव संकलन गरिएको छ ।
हालसम्म ३६ शवको उद्धार गरी पोखरा स्वास्थ्य विज्ञान प्रतिष्ठान अन्तरगत पश्चिमाञ्चल क्षेत्रीय अस्पताल लगिएको कास्की प्रहरी प्रमुख एसपी अजय केसीले जानकारी दिए । केही शव सेती खोंचमा फेला परेको तर निकाल्न गाह्रो भइरहेको र निकाल्ने प्रयास भइरहेको प्रहरीले जनकारी दिएको छ ।
आइतबार बिहान पोखरा अन्तर्राष्ट्रिय विमानस्थल नजिकै नयाँगाउँको खोंचमा विमान दुर्घटना भएको थियो । विमानमा ६८ यात्रु र ४ जना चालक दलका सदस्यसहित ७२ जना सवार थिए । बिहान साढे १०.२५ मा बजे काठमाडौंबाट पोखराका लागि उडेको ९ एन–एएनसी विमान पोखरा अन्तर्राष्ट्रिय विमानस्थलमा अवतरण गर्ने क्रममा पुरानो एअरपोर्ट र नयाँ एअरपोर्टको बीचमा रहेको नयाँगाउँस्थित सेतीको खोंचमा दुर्घटनामा परेको थियो ।
दुर्घटनामा पर्ने यतिको उक्त विमान पोखराको अन्तर्राष्ट्रिय विमानस्थलमा पहिलोपटक अवतरण गर्ने विमान थियो । उक्त विमानलाई यति एयरलाइन्सका वरिष्ठ क्याप्टेन कमल केसीले उडाएका थिए । क्याप्टेन केसी प्रशिक्षक पाइलट पनि हुन् । यही विमानबाट पोखरा अन्तर्राष्ट्रिय विमानस्थलमा पहिलो डेमो उडान गरेका थिए । नेपालमा ७२ यात्रु क्षमताको एटीआर विमान दुर्घटना भएको यो पहिलो घटना भएको बताइएको छ ।
अवतरणका लागि कम उचाइमा आइरहेका बेला पोखरा महानगरपालिका १७, घारीपाटन नजिकैको आकाशमा अस्वभाविक कोल्टे परेको एक स्थानीयले खिचेको भिडियोमा देख्न सकिन्छ । त्यसपछि भने केही सेकेन्डमै भुइँमा बजारिएको ठूलो आवाज सुनियो । त्यसलगत्तै धुवाँको मुस्लोसहित ठूलो आगो लाग्यो ।आगो लागेलगत्तै हेलिकोप्टरबाट पानी खन्याए पनि निभ्न सकेन । दुर्घटनापछि तत्कालै उद्धार गर्दा पनि जीवीत यात्रु भेटिन मुस्किल भएको छ ।
दुर्घटनाअघि विमानस्थलले अतवरणको अनुमति लिइसकेको थियो । ‘मौसमको समस्या थिएन, विमानको प्राविधिक कारणले दुर्घटना भएको प्रारम्भिक जानकारी प्राप्त भएको छ, । विमानमा आकाशमै आगोको झिल्को देखिएको स्थानीय बबरजंग गुरुङले जानकारी दिनुभयो ।
विमान अन्तिम पटक १०ः५० मा सम्पर्कमा थियो । त्यसपछि भने सम्पर्क हुन सकेन । विमान खसेको ठाउँ पुरानो आन्तरिक विमानस्थलको पूर्वपट्टि रहेको नेपाली सेनाको ब्यारेक पछाडि हो । नयाँ विमानस्थलतर्फ ल्याण्ड गर्नका लागि मोडिएको अवस्थामा विमान घनाबस्ती माथि उडिरहेको थियो । ‘पाइलटले बस्ती जोगाउन विमान सेती खोंचतिर लगेर अर्को दुर्घटना जोगाउन हरसम्भव प्रयास गरेको देखियो,’ प्रत्यक्षदर्शी जीवन दाहालले भने ।
दुर्घटनामा सेती खोंचमा माछा मार्न गएका दुई जना स्थानीय पनि घाइते भएका छन् । उनीहरु माछा मार्दै गरेको समयमा जहाज सेती खोंचमा खस्दा घाइते भएका हुन् । । उनीहरुलाई उद्धार गरेर अस्पताल पठाइएको छ । उक्त विमानमा चालक दलका सदस्यहरू कमल केसी, अन्जु खतिवडा सृजना होंगचुन र ओसिन आले मगर थिए । जहाजमा नेपाली ५३ जना, भारतीय नागरिक ५ जना, रसियन ४ जना, आयरल्याण्डका १, अस्ट्रेलियन १, अर्जेन्टिनी १, कोरियन २, फ्रान्सेली १ गरी ६८ जना यात्रु र चालक दलका ४ जना थिए ।
जहाज खोंचमा परेकाहरूकाले उद्धारमा कठिनाइ आएको छ । अहिलेसम्म ३६ जनाको शव फेला परेको कास्कीका प्रहरी प्रमुख एसपी अजय केसीले बताए । ‘अहिलेसम्म ३६ जनाको शव निकालिएको छ, बाँकी १०÷१२ जनाको शव माथिबाट देखिएको छ । निकाल्न प्रयत्न गरिरहेका छौं,’ उनले भने ।उक्त विमान दुर्घटनापछि पोखरा विमानस्थलबाट हुने उडानहरु स्थगित गरिएको छ ।
