मुस्ताङ। मुस्ताङको घरपझोङ गाउँपालिका–१ र २ जोड्ने छैरो तिब्बती क्याम्प जाने झोलुङ्गे पुल जोखिममा परेको छ। मुस्ताङको मार्फास्थित शीतोष्ण बागवानी विकास केन्द्रले कालिगण्डकी छैरो तिब्बती क्याम्पतर्फको खेतीयोग्य जमिन जोगाउन रिटेनिङ वाल निर्माण गर्ने क्रममा पुलको जमिन चर्किन पुगेपछि यो जोखिममा परेको हो।
घरपझोङ–१ छैरो तिब्बती क्याम्पका शरणार्थीलाई लक्षित गरी निर्माण भएको यो झोलुङ्गे पुलको क्याम्पतर्फको भागमा जमिन चर्किँदा पुलमा क्षति पुगेको छ। पुरानो झोलुङ्गे पुल जीर्ण भएपछि सोही स्थानमा नयाँ पुल निर्माण गरिएको थियो। क्याम्पका मुखिया टसी ढिन्डुकले जानकारी दिएअनुसार, “पुलको बिमा र पुलको डिपिसी धुजाधुजा भएको छ। पुल कुनै पनि बेला झनै ठूलो क्षति हुने खतरा बढेको छ।” उनले पुलमा मानिस हिँड्न जोखिम भएकाले हिँडडुल बन्द गरिएको बताए।
मुखिया ढिन्डुकले झोलुङ्गे पुल जोखिममा पर्दा क्याम्पका करिब ६० घरधुरीलाई राजमार्ग सडकमा आवतजावत गर्न समस्या परेको बताए। उनले पुलको मर्मत सुधार वा पुनःनिर्माणका लागि जिल्ला प्रशासन कार्यालय मुस्ताङमा निवेदन पेस गरेको पनि जानकारी दिए।
शीतोष्ण बागवानी विकास केन्द्र मार्फाका कार्यालय प्रमुख पद्मनाथ आत्रेयले आफ्नो कार्यालयको निर्माण कार्यले झोलुङ्गे पुलमा असर परेको स्वीकार गर्दै यसको मर्मत सुधारका लागि पहल गर्ने प्रतिबद्धता जनाएका छन्। उनले भने, “हामी जतिसक्दो छिटो झोलुङ्गे पुललाई यथाशीघ्र मर्मत गर्नेछौँ।”
पुल जोखिममा परेसँगै क्याम्पमा बस्ने शरणार्थीहरूलाई दैनिक आवतजावत र मालसामान ढुवानीमा समस्या भएको छ। अहिले पुल जोखिममा परेपछि उनीहरू छैरो गाउँ नजिकको अर्को झोलुङ्गे पुल तरेर करिब आधा घण्टा खर्चिएर राष्ट्रिय राजमार्गमा आउनुपर्ने बाध्यतामा छन्।
