काठमाडौँ। विश्वको सर्वोच्च शिखर सगरमाथा आरोहण गर्ने संसारभरका आरोहीहरूको पहिलो अन्तर्राष्ट्रिय सम्मेलन ‘एभरेष्ट समिटर समिट’ नेपालमा आयोजना हुने भएको छ। विश्वभरका पर्वतारोहीलाई एकै ठाउँमा भेला पारी उनीहरूको अनुभव आदानप्रदान गर्ने तथा साहसिक पर्यटन प्रवर्द्धन गर्ने उद्देश्यले एभरेष्ट एलाइन्स नेपालले यही जेठ १३ गते यो सम्मेलन आयोजना गर्न लागेको हो।
नेपालले पहिलोपटक ‘एभरेष्ट समिटर समिट’ काठमाडौँमा आयोजना गर्न लागेको एभरेष्ट एलाइन्स नेपालका अध्यक्ष सुदर्शन नेपालले जानकारी दिए। उनका अनुसार सम्मेलनमा भाग लिन हालसम्म १६ देशका एक सय ७७ जना आरोहीले आफ्नो नाम दर्ता गराइसकेका छन्। आयोजकका अनुसार सम्मेलनमा सगरमाथाको सफल आरोहण गरेका विश्वभरका पाँच सय आरोहीको सहभागिता रहनेछ।
सम्मेलनमा भारत र चीनसँगै संयुक्त राज्य अमेरिका, बेलायत, इटली, स्वीट्जरल्याण्ड, नर्वे, इरान, सिङ्गापुर, अष्ट्रेलिया, लेवनान, मोरक्को, युएईलगायत विभिन्न मुलुकका आरोहीहरूले सहभागिता जनाउनेछन्।
अध्यक्ष नेपालले भने, “सम्मेलनमा ७१ वर्षअघिका सगरमाथा आरोहीको सहभागिता रहनेछ। कीर्तिमानी आरोहीहरूले आफ्ना अनुभवहरू साट्नेछन्। फरक क्षमता भएका कीर्तिमानी आरोहीहरूको प्रस्तुति पनि रहनेछ।” उनका अनुसार सगरमाथा आरोहणको सात दशक लामो इतिहासमा पहिलोपटक हुन लागेको यो सम्मेलनमा पहिलोपटक सर एडमन्ड हिलारीसँग सगरमाथा आरोहण गरेका कान्छा शेर्पालाई विशेष सम्मान गरिनेछ।
अध्यक्ष नेपालले जलवायु परिवर्तनका कारण हिमाली क्षेत्रमा परेको प्रभावका बारेमा पनि विस्तृत छलफल हुने जानकारी दिए। हिमाल आरोहीहरूका समस्या र आरोहणका क्रममा भएका खुसीका पलहरू पनि आदानप्रदान गरिनेछन्।
आयोजकका अनुसार प्रकृतिका लागि विश्वव्यापी कोष (डब्लुडब्लुएफ), अन्तर्राष्ट्रिय एकीकृत पर्वतीय विकास केन्द्र (इसिमोड), अन्तर्राष्ट्रिय प्रकृति संरक्षण सङ्घ (आइयुसिएन), समृद्ध पहाडलगायत विभिन्न सङ्घसंस्थाको सहभागितामा हिमालका समस्याका बारेमा आरोहीहरूसँग समूहगत छलफल गर्ने कार्यक्रम रहेको छ।
पर्यटन व्यवसायीका छाता संस्थाहरू नेपाल एशोसिएसन अफ टुर एन्ड ट्राभल एजेन्ट्स (नाट्ट), ट्रेकिङ एजेन्सिज एशोसिएसन अफ नेपाल (टान), नेपाल पर्वतारोहण सङ्घ, होटल सङ्घ नेपाललगायत संस्थाको समन्वय र सहकार्यमा यो सम्मेलन आयोजना हुन लागेको अध्यक्ष नेपालले जानकारी दिए।
पर्यटन व्यवसायीहरूले यो सम्मेलनले नेपाल भ्रमण गर्न आउने र बढी खर्च गर्ने पर्यटकहरूलाई प्रोत्साहन गर्नुका साथै नेपालको पर्यटन प्रवर्द्धनमा महत्त्वपूर्ण सहयोग पुग्ने विश्वास व्यक्त गरेका छन्। नाट्टाका पूर्वअध्यक्ष अच्युत गुरागाईंले नेपालको पर्यटनमा यो समिटर सम्मेलन एक महत्त्वपूर्ण इभेन्टको रूपमा आयोजना हुने र यसले साहसिक पर्यटकीय गन्तव्यको प्रवर्द्धनमा ठूलो मद्दत पुग्ने विश्वास व्यक्त गरे।
