काठमाडौं । नेपाली कांग्रेसले दोस्रोपटक म्याद थपेर दिएको समयसीमा पनि क्रियाशील सदस्यता नवीकरणको काम केही जिल्लामा टुंगिन सकेको छैन। अब कुन जिल्लाले काम सक्यो, कसले सकेन र किन सकेन भन्नेबारे टुंगो लगाउन महामन्त्री गगन थापाको नेतृत्वमा बनेको समिति जेठ १ गते बैठक बस्ने तयारीमा छ।
महामन्त्री थापाले भने ,‘हामीले आजसम्मको म्याद दिएका थियौं, तर सबै जिल्लाले काम सकेका छैनन्,ू भन्दै अब विवरण संकलन गरेर मूल्यांकन गरिनेछ । समितिले दिएको एक्सेस वैशाख मसान्तसँगै स्वतः बन्द हुने निर्णय पनि यसअघि नै भइसकेको छ।
यो कांग्रेसको इतिहासमै पहिलो पटक हो, जब महाधिवेशनको मिति तोक्नु अघिनै क्रियाशील सदस्यता नवीकरण प्रक्रिया सुरु गरिएको हो। तर, बारम्बार म्याद थप्दा पनि काम अलपत्र पर्दा पार्टीको संगठनात्मक तयारीमाथि प्रश्न उठ्न थालेको छ।
१४ औँ महाधिवेशनका समय कांग्रेसमा ८ लाखभन्दा बढी क्रियाशील सदस्य थिए। अहिलेको नवीकरणले त्यो संख्या कति पुग्नेछ वा घट्नेछ भन्नेमा पनि सबैको चासो केन्द्रित छ।
