काठमाडौं – कीर्तिपुरस्थित त्रिवि क्रिकेट मैदानलाई ३०० दिनभित्र अन्तर्राष्ट्रियस्तरको फ्लडलाइटसहितको रंगशालामा रूपान्तरण गर्ने सरकारको निर्णयअनुसार काम हुन सकेन ।
तोकिएको समयावधि सकिन दुई दिन बाँकी रहँदा काम अझै अपूर्ण रहेको पाइएपछि प्रधानमन्त्री केपी शर्मा ओलीले सम्बन्धित पक्षलाई झिकाएर सोधीखोजी गरेका छन् ।
उनले सहरी विकास मन्त्रालय र निर्माण कम्पनीका प्रतिनिधिहरूसँग सोमबार स्पष्टीकरण मागेका हुन् ।
सरकारी अधिकारीहरूका अनुसार त्रिभुवन विश्वविद्यालयको जग्गा प्राप्तिमा भएको ढिलाइ, रुख हटाउने प्रक्रियाको कानुनी समयावधि र निर्माण सुरू भएपछि परेको पानीले कालो माटो हटाउनुपर्ने जस्ता कारणले तीन सिफ्टमा काम गरे पनि समयमै सम्पन्न हुन नसकेको जवाफ सम्बन्धित पक्षले दिएका छन् ।
निर्माणमा संलग्न प्रतिनिधिहरूले आगामी दुई महिनाभित्र प्यारापिट निर्माण र फ्लडलाइट जडान पूरा गर्ने प्रतिबद्धता जनाएका छन्। यता सरकारले आफूले थालेका काम तोकिएको समयमै सक्ने नीति अनुसार गर्नु जानकारी गराएको छ।
प्रधानमन्त्री ओलीले चेतावनी दिँदै तोकिएको नयाँ समयसीमा भित्र पनि काम पूरा नभए सहन नसकिने बताएको जानकारी दिएका छन् । उनले असारको अन्तिम सातासम्म कीर्तिपुर रंगशाला तयार हुने अपेक्षा गरिएको पनि बताएका छन् ।
