मुगु, : वन तथा वातावरणमन्त्री एवं राष्ट्रिय प्रकृति संरक्षण कोषका अध्यक्ष ऐनबहादुर शाही ठकुरीले सरकार प्रकृतिको संरक्षण गरी पर्यापर्यटन प्रवर्द्धन गर्न प्रयासरत रहेको बताउनुभएको छ ।
रारा राष्ट्रिय निकुञ्जमा स्थापना गरिएको राष्ट्रिय प्रकृति संरक्षण कोष कार्यालयको आज यहाँ उद्घाटन गर्दै उहाँले प्रकृति संरक्षणमा जोड दिएर पर्यटकीय क्षेत्रको विकास गरिने उल्लेख गर्नुभयो ।
मन्त्री शाहीले मुगुको रारा ताल नेपालको सबैभन्दा ठूलो तालका रूपमा मात्र सीमित नभई प्रकृतिको वरदान भएको बताउँदै यसको पर्यटकीय सम्भावना अभिवृद्धि गर्दै पर्यटन प्रवर्द्धनका लागि गरिएका प्रयासबारेमा जानकारी दिनुभयो । रारासँगै त्यस वरपरको प्रकृति संरक्षणका लागि कोषको कार्यालय स्थापना गरिएको उहाँको भनाइ छ ।
कोषका कार्यक्रमले रारा ताल र वरपरका क्षेत्रको प्रकृति संरक्षण र राष्ट्रिय निकुञ्जभित्रको वन तथा वन्यजन्तुको संरक्षणमा ठूलो योगदान पु¥याउने मन्त्री शाहीले बताउनुभयो ।
कोष कार्यालय कर्णाली प्रदेशमा पहिलो पटक रारा निकुञ्जमा स्थापना भएको भन्दै यस कार्यक्रममार्फत निकुञ्ज, रारा ताल, से–फोक्सुन्डोलगायत सम्रग कर्णाली प्रदेशको प्रकृति संरक्षणको क्षेत्रमा काम यसले काम गर्ने उहाँले उल्लेख गर्नुभयो । निकुञ्ज क्षेत्रभित्रका वन्यजन्तुको संरक्षण, उपचार र वन्यजन्तुको अध्ययन, अनुसन्धानमा पनि कोषले महत्त्वपूर्ण योगदान पु¥याउने उहाँले विश्वास व्यक्त गर्नुभयो ।
पछिल्लो केही वर्षयता रारा घुम्न आउने पर्यटकको सङ्ख्यामा पनि वृद्धि हुँदै गएको निकुञ्ज कार्यालयले जनाएको छ । पर्यटको सङ्ख्या वृद्धिसँगै धार्मिक पर्यटन क्षेत्रको विकासमा जोड दिइने र आगामी वर्षको बजेटमा धार्मिक पर्यटन प्रवर्द्धन र प्रकृति संक्षणमा जोड दिने कार्यक्रम सञ्चालन गर्न बजेट व्यस्थापन गरिने मन्त्री शाहीले बताउनुभयो । कोषका सदस्य सचिव डा नरेश सुवेदीले कोषका बारेमा जानकारी गराउँदै कोषले संरक्षणसँगै जनचेतना, अनुसन्धानका कार्य गर्दै आएको बताउनुभयो ।
कार्यक्रममा जिल्ला समन्वय प्रमुख मञ्जनबहादुर कार्की छायाँनाथ रारा नगरपालिकाका प्रमुख विष्णुकुमार भाम, सोरु गाउँपालिकाका अध्यक्ष केशरजङ्ग शाहीलगायतले प्रकृतिमा आधारित पर्यटन विकासका लागि तीनै तहका सरकार समन्वयात्मक रूपमा काम गर्नुपर्नेमा उहाँहरूले जोड दिनुभयो ।
