काठमाडौँ । यस वर्षको वसन्तकालीन याममा सगरमाथा आरोहणका लागि धमाधम अनुमति जारी भइरहेको छ। पर्यटन विभागका अनुसार, हालसम्म सात आरोही समूहका १७ महिला र ६० पुरुष गरी कुल ७७ आरोहीले सगरमाथा आरोहणको अनुमति लिइसकेका छन्।
विभागका निर्देशक लीलाधर अवस्थीका अनुसार, आजसम्म सगरमाथासहित २९ वटा अन्य हिमाल आरोहणका लागि अनुमति दिइएको छ। हालसम्म विभिन्न देशका १९८ आरोहीले हिमाल आरोहणका लागि अनुमति लिएका छन्। अन्नपूर्ण–१ मा ६६ जना, अन्नपूर्ण–५ मा आठ जना, मकालुमा १५ जना र ल्होत्सेमा १५ जनाले अनुमति पाएका छन्।
सगरमाथाको दोस्रो शिविरसम्म बाटो निर्माण कार्य जारी छ। सगरमाथा क्षेत्रमा तीव्र हावा चलेकाले बाटो निर्माणमा कठिनाइ भइरहेको छ। खुम्बु आइसफल क्षेत्रमा भर्याङ राख्ने र ह्याङ्गिङ एयरमा किला ठोक्ने काम भइरहेको छ। हालसम्म ११ सय मिटर बाटो निर्माण सम्पन्न भएको छ भने दोस्रो शिविरसम्म २२ सय मिटर बाटो बनाउन बाँकी छ।
सगरमाथाको आधार शिविरदेखि दोस्रो शिविरसम्म बाटो निर्माणको जिम्मा सगरमाथा प्रदूषण नियन्त्रण समिति (एसपीसीसी)ले लिएको छ। यसका लागि १० जनाको टोली खटाइएको छ। दोस्रो शिविरदेखि चुचुरोसम्म बाटो बनाउने अर्थात् ‘रोप फिक्सिङ’ (डोरी टाँग्ने) काम पर्वतारोहण सञ्चालक सङ्घले गर्नेछ। यसका लागि अशोक लामाको नेतृत्वमा आठ सदस्यीय टोली खटाइसकिएको छ। यो याममा सगरमाथा आरोहणको व्यवस्थापकीय जिम्मेवारी एट्के एक्सपिडिसन कम्पनीलाई दिइएको छ।
वसन्त ऋतु सगरमाथासहितका हिमाल आरोहणका लागि उपयुक्त मौसम मानिन्छ। यस याममा सगरमाथा आरोहणका लागि उल्लेख्य संख्यामा विदेशी पर्यटकहरू आउने गर्छन्।
