राजविराज (सप्तरी) : महिला बालबालिका तथा जेष्ठ नागरिकमन्त्री नवलकिशोर साह सुडीले महिलाको हकअधिकारका लागि राज्य गम्भिर हुनुपर्ने बताउनुभएको छ ।
सप्तरीको राजविराजस्थित मधेसप्रदेश प्रहरी तालिम केन्द्र जनकपुर सम्पर्क कार्यालय राजविराजको सभाकक्षमा आज आयोजित ६ दिने लैङ्गिक उत्तरदायी अनुसन्धान तथा सञ्चारसीपसम्बन्धी तालिम समापन कार्यक्रममा उहाँले महिलाको समाजमा अहिले पनि हिंसा कायम रहनु दुर्भाग्यपूर्ण रहेको उल्लेख गर्नुभयो ।
महिलालाई शिक्षा र स्वास्थ्य क्षेत्रमा सबल गराई अवसरसमेत दिन आवश्यक रहेको जनाउँदै मन्त्री सुडीले लैङ्गिक हिंसा अन्तय हुनुपर्नेमा जोड दिनुभयो । उहाँले भन्नुभयो, “महिलाको अधिकार सुनिश्चित गर्न सरकार प्रतिवद्ध रहेको छ । सरकार र गैरसरकारी संस्थाले सहकार्य गरेर भएपनि महिला अधिकार सुनिश्चित गर्दै महिला माथि हुने विभेद र हिंसा अन्त्य गर्न सकिन्छ । ”
कार्यक्रममा प्रमुख जिल्ला अधिकारी भोला दाहाल, प्रहरी उपरीक्षक ढकेन्द्र खतिवडाले महिला हिंसा न्यूनिकरणका लागि प्रहरी प्रशासनले गरेको प्रयास र खेलेको भूमिका बारे चर्चा गर्नुभएको थियो ।
–––
