काठमाडौं । पोखराको सुर्यदर्शन सहकारी गठी प्रकरण र काठमाडौँको स्वणलक्ष्मी सहकारी ठगी प्रकरणमा अदालतको आदेशमा दुई अदालतमा एक करोड ,२५ लाख धरौटी बुझाएर रिहा भएका पूर्व गृहमन्त्री तथा निलम्बित रास्वपा सभापति रवि लामिछानेमाथि बुटवलको सुप्रिम बचत तथा ऋण सहकारीको रकम ठगी प्रकरणमा भोली जिल्ला अदालत रुपन्देहीमा दर्ता गरिने भएको छ । बिहीबार जिल्ला सरकारी वकिल कार्यालय रुपन्देहीले बुटवलको सुप्रिम बचत तथा ऋण सहकारीको रकम अपचलनसम्बन्धी थप अभियोजन मुद्दा दर्ता गरेको छ । पूरक अभियोजन समय अभावका कारण शुक्रबार दर्ता हुने भएको सरकारी वकिल कार्यालय रुपन्देहीले जनाएको छ ।
यसअघि सरकारी वकिल कार्यालयले दुवै अभियोजन दर्ता गर्ने तयारी गरेको थियो । वैशाख ३ गते दर्ता भएको मुद्दामा प्रतिवादी बनाइएका सुप्रिम सहकारीका पूर्वअध्यक्ष एवं संरक्षक गितेन्द्रबाबु राईसहितका २८ जनाविरुद्ध वैशाखमा मुद्दा दर्ता भएको थियो ।
जिल्ला सहन्यायाधिवक्ता एवं सूचना अधिकारी उमाकुमारी केसीका अनुसार सुरु मुद्दामा सहकारी ठगीसम्बन्धी मात्र मुद्दा दर्ता भएकाले बिहीबार १७ जनालाई संगठित अपराध पनि थप गरेर मुद्दा दर्ता गरिएको हो । ‘रवि लामिछाने, छविराज जोशीसहित जोडिएको पूरक जाहेरीअनुसारको अभियोजन शुक्रबार दर्ता गर्ने तयारी रहेको उनको भनाइ छ । सुरु मुद्दाका २८ जनामध्ये १७ जनालाई थप संगठित अपराध अभियोजन थप गरिएको र ११ जनालाई ठगीमै मुद्दा चल्ने उनले बताइन् ।
अधिकारी केसीका अनुसार थप र पूरक अभियोजनमा ४२ जनाबाट १ अर्ब १२ करोड रुपैयाँ माग दाबी गरिएको छ । सुप्रिम सहकारीका १० हजार ३ सय ९१ जनाले बचत गरेको १ अर्ब ३१ करोडमध्ये ८६ करोड १८ लाख रुपैयाँभन्दा बढी रकम अपचलन भएको छ । त्यो मध्ये १४ करोड रुपैयाँभन्दा बढी रकम गोर्खा मिडिया नेटवर्कमा गएको छ ।
सरकारी वकिल कार्यालयले पूरक अभियोजनमा राष्ट्रिय स्वतन्त्र पार्टीका सभापति रवि लामिछाने, पूर्वडीआईजी छविलाल जोशीसहितका थप १४ जना रहेका छन् । जिल्ला सरकारी वकिल कार्यालयले रवि र छविविरुद्ध सहकारी ठगी र संगठित अपराधअन्तर्गत मुद्दा दर्ता हुने जनाएको छ ।
सम्पत्ति शुद्धीकरणमा कास्की अदालतमा दर्ता भएर मुद्दा जारी रहेकाले अहिले दर्ता गर्नु नपर्ने निष्कर्ष भएकाले ठगी र संगठित अपराधमा मात्र पूरक अभियोजन हुनेछ ।
सो सहकारी ठगी प्रकरणमा लामिछानेलाई ४ करोड १५ लाख र जोशीलाई ४ करोड २८ लाख रुपैयाँ बिगो माग गरिएको छ । सहकारी ठगी प्रकरणमा लामिछानेसहित मुछिएको जिल्ला प्रहरी कार्यालय, चितवन र पर्साले पनि अनुसन्धान अन्तिम चरणमा पुर्याएका छन् । रुपन्देहीको मुद्धा सकिएपछि चितवनमा र पर्सामा मुद्दा दर्ता गर्ने सरकारी वकिलको तयारी छ ।
