नेपाली कांग्रेसका शीर्ष नेता र मन्त्रीहरू बीच बिहीबार भएको छलफलमा मन्त्रीहरूले केपी शर्मा ओली नेतृत्वको सरकारमा काम गर्न सहज नभएको बताएका छन्।
काम गर्ने क्रममा आइपरेका समस्या र अप्ठ्याराबारे बैठकमा जानकारी गराउने क्रममा ओली सरकारमा सहभागी कांग्रेसका मन्त्रीहरूले काम गर्न प्रत्यक्ष असहयोग नभए पनि समस्या भने रहेको बताएका हुन्।
सभापति देउवा निवास बूढानीलकण्ठमा बोलाइएको कांग्रेस संसदीय दल कार्यसमिति बैठकमा मन्त्रीहरूले आ-आफ्नो नेतृत्वकाे मन्त्रालयमा भइरहेका काम बारे ब्रिफिङ गरेका थिए। छलफलका १० मन्त्री र २ राज्यमन्त्री सहभागी छन्।
बैठकमा सहभागी युवा तथा खेलकुदमन्त्री तेजुलाल चौधरीले छलफल चलिरहेकै बेला सञ्चारकर्मीसँग कुराकानी गर्दै केही मन्त्रीहरूले ओलीसँग काम गर्दा प्रत्यक्ष अप्ठ्यारो नभएपनि कहीँ न कहीँ समस्या रहेको बताएको जानकारी दिए।
‘सिधै अप्ठ्यारो भएको जस्तो लाग्दैन। तर सोचे अनुसारको काममा जति फास्ट हुनुपर्ने जति अगाडि बढ्नुपर्ने त्यो कुरा कहीँ न कहिबाट समस्या भएको हाम्रा साथीहरूले महसुस गरेका छन्‚’ उनले भने‚ ‘तर‚ हाम्रा नेताहरू मिलेर त्यसलाई समाधान गर्ने उपायहरू बताइरहनुभएको छ।’
मन्त्री चौधरीले अनुसार बैठकमा महामन्त्री गगन थापाले जारी भएका अध्यादेश बारे पार्टीमा जानकारी गराएका थिए। महामन्त्री थापाले सरकारका कामलाई थप प्रभावकारी र व्यवस्थित बनाउन अध्यादेश ल्याउनु परेकोबारे बिफ्रिङ गरेका थिए।
‘अध्यादेशको विषयमा पनि बैठकमा छलफल भएको छ। छलफल नै गरेर ल्याएकाले यसबारे चर्चा परिचर्चा गर्न आवश्यक छैन,’ चौधरीले भने।
