काठमाडौं । शुक्रवार अन्तराष्ट्रिय बजारमा कच्चा तेलको भाउ बढेको छ । बिहिवार हरियालीमा बन्द भएको तेल बजार शुक्रवार पनि उकालो लागेको हो ।
चीनले कोभिडसम्बनधी प्रतिबन्धहरू खुकुलो पारेपछि आर्थिक गतिविधि बढ्ने अनि तेलको माग बढ्ने आशामा शुक्रवार बिहानी कारोबारमा कच्चा तेल झन्डै १ डलरले बढेको छ ।
अमेरिकामा वर्ष अन्त्यमा हिउँदे आँधीका कारण तेल उत्पादन प्रभावित हुँदा कच्चा तेल सञ्चिति घट्दा पनि तेलको भाउले टेवा दिएको हो । लन्डनस्थित आईसीई एक्सचेञ्जको कोमेक्स डिभिजनमा ३ः४५ जीएमटीमा ब्रेन्ट क्रुडको भाउ प्रतिब्यारेल ७९ डलर ६३ सेन्टमा पुगेको थियो । यो अघिल्लो दिन बजार बन्द हुँदाको भन्दा १ दशमलव २ प्रतिशतत धेरै हो । बिहीवार बजार बन्द हुँदा ब्रेन्टको भाउ प्रतिब्यारेल ८३ सेन्टले बढेर ७८ डलर ६९ सेन्टमा उक्लिएको थियो ।
सोही समयमा न्यूयोर्क मर्कन्टाइल एक्सचेञ्जको कोमेक्स डिभिजनमा वेष्ट टेक्सस इन्टरमिडियट ९डब्ल्यूटीआई०को भाउ पनि प्रतिब्यारेल १ दशमलव २ प्रतिशत अर्थात् ९१ सेन्टले बढेर ७४ डलर ५८ सेन्टमा पुगेको थियो । अघिल्लो दिन डब्ल्यूटीआई पनि ८३ सेन्टले बढ्दै ७३ डलर ६७ सेन्टमा बन्द भएको थियो । शुक्रवार तेल बजारमा हरियाली देखिए पनि हप्ताभरको कारोबारमा भने भाउ झन्डै ७ प्रतिशतले घट्ने क्रममा छ । विश्व अर्थतन्त्र मन्दीमा जाने भयका कारण तेल बजारमा कारोबार घटेको छ ।
चीनले अर्थतन्त्र खुलाउने अनुमान अनि विशेषगरी घरजग्गा बजारलाई टेवा दिन स्टिमुलस उपायहरू आउने आशाले पनि तेलको भाउ बढेको हो । डलर केही कमजोर बन्दा पनि तेल बजारले टेवा पाएको सीएमसी मार्केट्सकी एक विश्लेषक टिना टेङ भन्छिन् ।
चीनले बिहिवार कर्जामा चुर्लुम्म डुबेको घर जग्गा बजारलाई टेवा दिन पहिलो पटक घर किन्न लागेकाहरूलाई धितो कर्जाको दरमा समायोजन गर्न मिल्ने गतिशिल संयन्त्र स्थापना गर्ने घोषणा गरेको थियो ।
चीनमा आउँदै गरेको नयाँ वर्षमा रेल, सडक, जल र हवाई यात्राको संख्या २ अर्ब १० करोड पुग्ने अनुमान गरिएको यातायात अधिकारीले शुक्रवार बताएका थिए । यो गत वर्षको सोही अवधिको तुलनामा ठ्याक्कै दोब्बर हुनेछ । शनिवारदेखि शुरू हुने सार्वजनिक बिदाको समयको दैनिक हवाई यात्रा सन् २०१९ मा कोरोना भाइरसको महामारी शुरू हुनु अघिको झन्डै ७३ प्रतिशत आसपास आउने देखिन्छ ।
चीन विश्वको सबैभन्दा ठूलो कच्चा तेल आयातकर्ता हो । चीनले गएको वर्षको अन्त्यतिर एक्कासी कोभिड विरुद्धको शून्य सहनशिलताको नीति अन्त्य गरेको थियो । यसका कारण हालैका दिनमा त्यहाँ कोभिड विष्फोटक रुपमा बढिरहेको छ । अमेरिकामा डिसेम्बर ३० सम्मको कच्चा तेलको सञ्चिति १४ लाख ब्यारेलले घटेको ऊर्जा सूचना विभागको तथ्यांकले देखाएको थियो । एजेन्सी
