लुम्बिनी—नेपालको सांस्कृतिक सम्पदा संरक्षणको प्रयासलाई प्रोत्साहित गर्दै अमेरिकी राजदूतावासले लुम्बिनी विकास कोष र पुरातत्त्व विभागसँगको सहकार्यमा लुम्बिनी संग्रहालय संरक्षण परियोजना सुरु गरेको छ।
यो परियोजनाको लागि अमेरिकी राजदूतहरूको सांस्कृतिक संरक्षण कोषबाट प्रदान गरिएको करिब सभा तीन करोड रुपैयाँ अनुदान दिइएका छ । यो अनुदानले लुम्बिनी संग्रहालयको अनमोल पुरातन वस्तुहरूको संरक्षण र दस्तावेजीकरणलाई समर्थन गर्नेछ, जसले नेपालको ऐतिहासिक र आध्यात्मिक पहिचानलाई महत्त्वपूर्ण योगदान पुर्याउँछ।
यस परियोजनाले, यस क्षेत्रको पहिलो अत्याधुनिक संरक्षण प्रयोगशाला पनि स्थापना गर्नेछ जसले स्थानीय र अन्तर्राष्ट्रिय विज्ञहरूलाई लुम्बिनी र वरपरका स्थलहरूका कलाकृतिहरू अध्ययन र संरक्षण गर्न उपकरणहरू उपलब्ध गराउनेछ।यस परियोजनाले नेपालको समृद्ध सम्पदालाई आगामी पुस्ताका लागि सुरक्षित गर्ने सुनिश्चित गर्दै सांस्कृतिक संरक्षणमा सीपहरू सुदृढ गर्ने तालिम कार्यक्रम पनि समावेश गर्ने छ। सन् २००३ देखि अमेरिकी राजदूतावासले नेपालभरि सांस्कृतिक संरक्षणमा लगानी गर्दै आएको छ।
यसले नेपालको समृद्ध सांस्कृतिक सम्पदालाई सम्मान गर्ने र सुरक्षा गर्ने विभिन्न परियोजनाहरूलाई सहयोग गर्दै आएको छ । लुम्बिनी संग्रहालय संरक्षण परियोजना यो निरन्तर साझेदारीको पछिल्लो कदम हो, जसले मानवजातिको साझा इतिहासको संरक्षणको महत्त्वलाई झल्काउँछ। अन्तर्राष्ट्रिय विशेषज्ञता र स्थानीय प्रतिबद्धतालाई एकीकृत गर्दै, यो परियोजना यस क्षेत्रभरि सांस्कृतिक संरक्षण प्रयासहरूको लागि एक उदाहरण बन्ने अपेक्षा गरिएको छ।
