पोखरा, १८ पुस । पोखरा–पोखराको मैदानमा पहिलो उपाधिको खोजीमा रहेको विभागीय त्रिभुवन आर्मी क्लब फेरि एकपटक अभागी बन्यो । पोखरामा दोस्रो पटक उपाधिको खोजीमा रहेको संकटाले आर्मीको उपाधि उचाल्ने सपनालाई प्रिक्वार्टरफाईनलबाटै निराश बनायो । नयाँ खेलाडी सम्मिलित संकटाले ‘स्किल फुल’ गेम देखाएपछि चार पटक पोखराको मैदानमा फाइनल खेलेको आर्मी सोमबार ३–१ गोलमा पराजित हुदैं बाहिरियो । आर्मीले आहा रारा गोल्डकपको उपाधि खडेरी तोड्न यो वर्ष पनि असमर्थ रह्यो । संकटाले १९ औं संस्करणको आहा रारा गोल्डकप उचालेको थियो । यद्यपि यो सहभागिता भने छैटौं हो । सेमिफाईनल प्रवेश गरेको संकटाले फाइनल प्रवेशको लागि अर्को विभागीय क्लब सशस्त्र प्रहरी बल(एपीएफ क्लब) सँग खेल्ने छ ।
संकटाको संकटमोचन विदेशी खेलाडीले गरे । उत्कृष्ट कमब्याक गर्ने क्रममा संकटाले अफ्रिकन खेलाडीको गोलबाट खेलमा फर्कियो । १६ औं मिनेटमा आर्मीले पेनाल्टीमा गोल गर्दै अग्रता लियो । आर्मीको अग्रता पहिलो हाफसम्म पनि कायम रहेन् । संकटाका निशान खड्काले दिनेश हेमजनलाई पेनाल्टी क्षेत्रमा लडाएपनि पाएको पेनाल्टीलाई नवयुग श्रेष्ठले गोल गर्दै अग्रता दिलाए ।
आर्मीले अग्रताको खुसीयाली पहिलो हाफसम्म पनि कायम गर्न सकेन् । पावरगेममा माहिर आर्मीले ३६ औं मिनेटमा अफ्रिकन खेलाडीको गोलबाट संकटामा खेलमा फर्कियो । कप्तान सुनील बलले डिबक्सभित्र मिलाईदिएको छोटो पासलाई मेसुकेले गोल गर्दै संकटालाई उद्दार गरे । उनको गोलसँगै उत्साहित संकटाले दोस्रो हाफ अझ जुझारु प्रदर्शन गर्यो ।
गोलको लागि निकै हतारिएको आर्मीले संकटाको स्ट्राईकरलाई रोक्ने प्रयास ७८ मिनेटसम्म रह्यो । तर ७९ औं मिनेटमा सुरजजिउ ठकुरीले संकटाको लागि गोल गरेपछि आर्मीले क्रमिक रुपमा खेलमा लय गुमाउन पुग्यो । स्टेफन विनोङले सिक्स यार्ड बक्सबाट फष्टबारमा प्रहार गरेको बल बारमा लागेर रिवाउण्ड हुन पुग्यो । रिवाउण्ड बललाई ठकुरीले गोलमा परिणत गरे । पछि परेको अवस्थामा आर्मीले गोल फर्काउने प्रयास गरेपनि सफलता पाउन सकेन् । अतिरिक्त समयमा युद्ध शाहीले फितलो प्रहारलाई गोललाईनबाट क्लियर गर्न नसकेपछि आर्मी ३–१ गोलको हार स्वीकार्यो । मेसुकेको पासमा म्यान अफ दि म्याच स्टेफन विनोङले ‘ओपन पोष्ट’मा प्रहार गरे । आर्मीका डिफेण्डर शाहीले रोक्न प्रयास गरेपनि बलले जाली चुम्यो । आर्मी पोखराको मैदान र आहा रारा गोल्डकपमा अभागी बन्दै आएको छ । आर्मीले सातौं, आठौं, १४ औं र १७ औं गोल्डकपमा फाईनल खेलेपनि उपाधि उचाल्न सकेको छैन् ।
‘जित्नकै लागि आएका हौं । गेम निकै टफ थियो’ संकटाका प्रशिक्षक सल्यान खड्गीले भने–‘पाएको अवसरलाई सदुपयोग गर्यौं । फिनिसिङमा चुकेनौं ।’ आर्मीले १४ औं मिनेटमा दिनेश हेमजनको पावर सट बाहिरिन पुग्यो । त्यसपछि ६७ औं मिनेटमा सुदिल राईले डिबब्स बाहिरबाट हानेको प्रहारलाई संकटाका गोलकिपरले उत्कृष्ट ‘डाईभ’ सेभ गरेपछि संकटालाई संकटबाट टारे । संकटाले पनि १८ र २७ औं मिनेटमा दुईवटा अवसरलाई गुमाउन पुग्यो । सहारा क्लबको आयोजना तथा हिमश्री फुड्स प्रालिको उत्पादन आहा रारा चाउचाउको मुख्य प्रायोजन रहेको २२ औं आहा रारा गोल्डकपको मंगलबारको अन्तिम क्र्र्वाटरफाईनल मनाङ मस्र्याङदी र भुटनिज युथ स्पोर्टस क्लब अमेरिका बीच हुने छ।
