काठमाडौँ । रुस र युक्रेनबीच पछिल्लो ३३ महिनादेखि चलिरहेको नयाँ मोडमा जाने संकेत देखिएको छ । दुई देशबीचको हिंसात्मक द्वन्द्वमा हालसम्म हजारौंको मृत्यु भइसकेको छ । कतिपय अपुष्ट रिपोर्टले मृतकको संख्या एक लाखभन्दा बढी रहेको दाबी समेत गरिएको छ ।
दुई देशबीचको द्वन्द्वबीच अमेरिकाले ठूलो निर्णय गरेको छ । रिपोर्टहरूका अनुसार अमेरिकी राष्ट्रपति जो बाइडेनले युक्रेनलाई रूसमा आक्रमण गर्न क्षेप्यास्त्र प्रयोग गर्न अनुमति दिएका छन् । युद्ध सुरु भएदेखि युक्रेनको प्रमुख सहयोगी रहेको अमेरिकाले अहिलेसम्म यस्तो अनुमति दिएको थिएन ।
रुसले युक्रेनमाथि दबाब बढाउन व्यापक आक्रमण गरेपछि अमेरिकाले आपूर्ति गरेको मिसाइल प्रयोग गर्न अनुमति दिएको हो । बाइडेनको यो निर्णय अमेरिकाको नीतिमा ठूलो परिवर्तन भएको दाबी गरिएको छ ।
अमेरिकाका निर्वाचित राष्ट्रपति डोनाल्ड ट्रम्पले जतिसक्दो चाँडो युद्ध अन्त्य गर्न सबै सम्भावित उपायहरू अवलम्बन गर्ने बताउदै आएको र युक्रेनलाई दिएको सहायता सीमित गर्ने रणनीति बनाइरहेका बेला अमेरिकाले आफ्नो नीतिमा परिवर्तन गरेको छ ।
मिडिया रिपोर्टका अनुसार रुसले युक्रेनमा आक्रमण गर्न उत्तर कोरियाको सहयोग लिएको प्रमाण भेटिएपछि अमेरिकाले आफ्नो नीतिमा परिवर्तन गरेको हो । उत्तर कोरियाले रुसमा हजारौं सेना पठाएको छ । यस निर्णयको प्रतिक्रियामा अब थप घातक हतियारहरू प्रयोग हुने सम्भावना छ ।
अमेरिकाको अनुमतिपछि युक्रेनले अब रुसविरुद्ध ठुलो आक्रमण गर्नसक्ने अनुमान गरिएको छ, जसले यो युद्ध अझ भयावह हुने विश्लेषण गरिएको छ ।
