सत्तारुढ दल नेपाली काँग्रेस र नेकपा (एमाले)बीचकाे दुई दलीय संयन्त्रकाे बैठकले आगामी डिसेम्बरमा हुने प्रधानमन्त्री केपी शर्मा ओलीकाे चीन भ्रमणकाे गृहकार्यमा सहजीकरण गर्ने निर्णय गरेकाे छ। बुधबार बसेकाे संयन्त्रकाे बैठकले साे निर्णय गरेकाे हाे।
‘चिनियाँ प्रधानमन्त्री लि छियाङको निमन्त्रणामा आगामी डिसेम्बर महिनामा हुने सम्माननीय प्रधानमन्त्री केपी शर्मा ओलीको मित्रराष्ट्र चीनको औपचारिक भ्रमणको तयारीको संयोजन प्रधानमन्त्री केपी शर्मा ओली र नेपाली कांग्रेसका सभापति शेरबहादुर देउवाको निर्देशनमा परराष्ट्रमन्त्री डा. आरजु राणा देउवाले गर्ने। दुई नेताको निर्देशन अनुरुप संयन्त्रको कार्यदलले भ्रमणका लागि आवश्यक गृहकार्यमा सहजिकरण गर्ने’, बैठककाे निर्णय नम्बर २मा उल्लेख छ।
त्यस्तै बैठकले संयन्त्रकाे संयाेजन दुई दलले पालैपालाे एक-एक महिना गर्ने निर्णय पनि गरेकाे छ। जसअनुसार पहिलाे महिना (कात्तिक २१ देखि मंसिर २०) नेपाली काँग्रेसका उप-सभापति पूर्णबहादुर खड्काले कार्यदलकाे संयाेजन गर्ने भएका छन्।
प्रधानमन्त्रीसमेत रहेका एमाले अध्यक्ष ओली र काँग्रेस सभापति शेरबहादुर देउवाबीच कात्तिक १५ गते भएकाे छलफल अनुसार दुई दलीय संयन्त्र निर्माण गरिएकाे हाे। संयन्त्रको कार्यदलमा नेपाली कांग्रेसको तर्फबाट उपसभापति पूर्णबहादुर खड्का, महामन्त्री गगनकुमार थापा, केन्द्रीय सदस्य एवम् गृहमन्त्री रमेश लेखक र केन्द्रीय सदस्य एवम् परराष्ट्र मन्त्री डा. आरजु राणा देउवा रहेका छन्। भने, नेकपा (एमाले)को तर्फबाट वरिष्ठ उपाध्यक्ष ईश्वर पोखरेल, उपाध्यक्ष एवम् उपप्रधानमन्त्री विष्णुप्रसाद पौडेल, महासचिव शंकर पोखरेल र उपमहासचिव विष्णु रिमाल रहेका छन्।
संयन्त्रलाई प्रदेश र जिल्ला तहमा पुर्याउने निर्णय पनि गरिएकाे छ।
