पोखरा, ५ पुस । लेखनाथको संस्कृति, स्थानीय उत्पादन, विकास र समृद्धि भन्ने मूल नाराका साथ पुस ७–१८ गतेसम्म लेखनाथ महोत्सव गरिने भएको छ । महोत्सवको पूर्वसन्ध्यामा आयोजक संस्था लेखनाथ उद्योग वाणिज्य संघले मंगलबार पत्रकार सम्मेलन गरी १८ औं संस्करणको लेखनाथ महोत्सव २०७९ को तयारी पूरा भएको जानकारी दिएको हो ।
पोखरा–२७ तालचोक स्थित डाँडाकोनाकमा संचालन हुने उक्त महोत्सवको मुख्य उद्देश्य वित्तीय क्षेत्रको तरलतालाई चलायमान, औद्योगिक उत्पादन तथा हस्तकलाका सामान, स्थानीय उत्पादन लघु तथा साना उद्योगको प्रवद्र्धन गर्नुको साथै आवश्यक ज्ञान सीप, उद्यमशीलता र प्रविधि हस्तान्तरण गर्नु रहेको जानकारी लेखनाथ उद्योग वाणिज्य संघका अध्यक्ष छत्रधर आत्रेयले दिनुभयो ।
यसका अलवा जातीय भेषभूषा, कला, संस्कृति, रितिरिवाजको जगेर्ना, आन्तरिक एवं वाह्य पर्यटक आकर्षण गर्नु पनि रहेको पत्रकार सम्मेलनमा बताइएको छ । महोत्सवको अर्को आकर्षण यस क्षेत्रका पर्यटकीय स्थल बेगनास तथा रुपातालका साथै यस वरपरका कोट, मठमन्दिर,तथा हरियाली जंङ्गलको साङ्केतिक रुपमा प्रतिबिम्वित हुने गरी प्रदर्शन गरिने जानकारी अध्यक्ष आत्रेयले दिनुभयो ।
दुई लाख ५० हजार दर्शकले महोत्सव अवलोकन गर्नुको साथै दश करोड रुपैयाँको कारोबार हुने अनुमान आयोजक संस्थाले गरेको छ । महोत्सव स्थलमा ३३७ स्टलहरु राखिने भएको छ । महोत्सवबाट करिब ९५ लाख रुपैयाँ आम्दानी, ८५ लाख रुपैयाँ खर्च र दश लाख रुपैयाँ मुनाफा हुने अनुमान आयोजक संस्था लेखनाथ उद्योग वाणिज्य संघको छ ।
महोत्सवबाट हुने मुनाफाले प्रदर्शनी स्थल र संघको भवन स्थरउन्नतिका, कवि शिरोमणि लेखनाथ पौड्यालको जन्मस्थल विकास र लेखनाथ क्षेत्रमा औद्योगिक क्षेत्र निर्माण लागि सरकारसँग पहल गर्ने रहेको जानकारी पनि पत्रकार सम्मेलनमा दिइएको छ ।
महोत्सव सफल रुपमा सम्पन्न गर्नका लागि ८ सदस्यीय निर्देशक समिति, ५१ सदस्यीय उपसमिति संयोजक, १३ सदस्यीय उपसमिति सल्लाहकार, ३७ सदस्यीय महोत्सव सललाहाकार समिति , १६० सदस्यीय कार्यसम्पादन समिति सदस्य र दुई हजार एक सय मूल समारोह समिति सदस्य गठन गरिएको जानकारी पनि उक्त अवसरमा दिइएको छ ।
महोत्सव अवलोकनका गर्न विद्यार्थीलाई ५० रुपैयाँ, सर्वसाधारणका लागि ८० रुपैयाँ र कन्सर्ट टिकट एक सय ५० रुपैयाँ तोकिएको छ । महोत्सवमा पर्यटन प्रवद्र्धन र नयाँ उद्योगको प्रवद्र्धन गर्नका लागि आयोजकले निशुल्क स्टलको व्यवस्था गरेको छ ।
महोत्सवमा रेस्टुरेन्ट, हस्तकला, कृषि, अटो, रेडिमेट, वित्तीय संस्था, पर्यटन प्रवद्र्धन, सूचना प्रविधी र उद्योगका स्टल रहने प्रचारप्रसार संयोजक राजेन्द्र ओझाले बताए ।कवि शिरोमणि लेखनाथको सम्मानमा सोमबार शिरोमणिद्वारा रचित १८ कविता १८ कविले वाचन गरेका थिए ।
