पोखरा, २७ मंसिर । पोखराका विभिन्न सडक छेउमा याताायातका साधन पार्किङ गरेवापत लिइँदै आइएको शुल्क मंगलबाट हट्ने भएको छ । पोखरा महानगरले निजी कम्पनीसँग गरेको ठेक्का आज (मङ्गलबार) सकिएपछि अबका दिनमा सडकबाट पार्किङ शुल्क उठाइने छैन । पोखरा महानगरले यसअघि वि.सं २०७७ सालको मङ्सिर १४ गते महानगर भित्रको सडकमा पार्किङ व्यवस्थापन संकलनका लागि निजी कम्पनी फेवा सावित्री जोइन्ट भेन्चरसँग ठेक्का सम्झौता गरेको थियो ।
दुई वर्षका लागि भएको उक्त ठेक्का सम्झौतामार्फत महानगरले तीन करोड १६ लाख ७० हजार रुपैयाँ प्राप्त गरेको थियो । सोही सम्झौताअनुरुप कम्पनीले २०७७ सालको मङ्सिर २८ देखि २०७९ सालको मङ्सिर २७ गतेसम्म पोखराका विभिन्न क्षेत्रमा पार्किङ व्यवस्थापन भनेर शुल्क उठाउँदै आएको छ ।
कम्पनीले हाल प्रतिदिन पार्किङ शुल्क भनेर मोटरसाइकल र स्कुटरलाई १० रुपैयाँ, त्यसैगरी ठूला सवारी साधनलाई प्रति घन्टा ३० रुपैयाँ उठाइएको थियो भने कम्पनीले मझौला सवारी साधनलाई मुख्य सडक क्षेत्रमा ३० रुपैयाँ र हलुका सवारी साधनमा २० रुपैयाँ प्रति घन्टा शुल्क उठाउँदै आएको थियो । पोखरा महानगरपालिकाका प्रमुख धनराज आचार्यले गत असारमै यस ठेक्काको म्याद सकिएपछि अब भने पार्किङ निःशुल्क हुने घोषणा गरिसकेका छन् ।
