सन् २०२३मा बेलायतको सत्ता सम्हालेका प्रधानमन्त्री ऋषि सुनकले आगामी जुलाई ४ मा निर्वाचन घोषणा गरेका छन्। त्यो बेला प्रधानमन्त्रीका लागि निर्वाचनमा होमिँदा उनले एउटा वाचा गरेका थिए ‘अवैध आप्रवासन रोक्ने।’ तर, उनको कार्यकालभरि त्यो घटेन बरु बढ्न थाल्यो।
अहिले विपक्षी दलहरूले आलोचना गर्नेमध्ये सबैभन्दा मुख्य विषय आप्रवासनको पनि हो। जसलाई सरकारले पनि आफ्नो चुनौतीका रुपमा लिएको छ।
एउटा सरकारी तथ्याङ्कअनुसार सन् २०२४मामात्रै १० हजारभन्दा बढी आप्रावासीहरू बेलायतमा भित्रिएका छन्। खासगरी युरोपका विभिन्न देशहरूमा छिर्नका लागि उनीहरूले बेलायतको बाटो समाउँछन्। बेलायतले पछिल्ला वर्षहरूमा आप्रवासनका सवालमा कडा नीति अपनाए पनि अवैधरुपमा बेलायतमा छिर्नेहरूको संख्या भने घट्न सकेको छैन। अघिल्लो वर्षमात्रै बेलायती सरकारले विद्यार्थी भिसाका नीति नियमहरूमा समेत कडा परिमार्जन गरेको थियो।
यसरी बेलायत भित्रिने ‘अनियमित’ आप्रवासीहरू साना डुङ्गामार्फत समुद्र पार गरेर बेलायत पुगेका बेलायतको सरकारी तथ्याङ्कले देखाएको छ।
कन्जरभेटिभ पार्टीका नेता तथा प्रधानमन्त्री ऋषि सुनकले संसदीय निर्वाचनको क्रममा सीमामा अवैध बाटोबाट आवतजावत रोक्नका लागि गरेको वाचा पूरा नभएको भन्दै विपक्षीहरू भने आलोचनामा उत्रिएका छन्।
सरकारी अधिकारीका अनुसार गत साताको अन्त्यतिरमात्रै २८८ जना आप्रवासी शरणार्थीहरूले पाँचवटा डुङ्गामा अवैध बाटोबाट बेलायत छिरेका थिए।
बेलायत आन्तरिक मन्त्रालयको तथ्याङ्कअनुसार सन् २०२४ सम्म समुद्री बाटो भएर अवैधरूपमा बेलायतको विभिन्न भू-भागमा प्रवेश गर्ने व्यक्तिको सङ्ख्या १० हजार १७० पुगेको छ। यो सङ्ख्या गत वर्षको यही अवधिमा रेकर्ड गरिएको सङ्ख्याको तुलनामा ३५ प्रतिशतले बढी हो।
सन् २०२४को पहिलो पाँच महिनामा समुद्री मार्गबाट बेलायत आउने कागजविहीन आप्रवासीको सङ्ख्या यसअघिको तुलनामा उच्च रहेको थियो।
सुनकले जुलाई ४ को लागि आम निर्वाचनको आह्वान गरेका छन्। आप्रवासी समस्या यो निर्वाचन अघि नै ठुलो मुद्दाको रूपमा देखिएको छ।
मुख्य विपक्षी लेबर पार्टीले हजारौं शरणार्थीहरूलाई जबरजस्ती रुवान्डामा निर्वासित गर्ने उनको प्रमुख योजना मतदानको दिन अघि सुरु नहुने र यो विवादास्पद योजना खारेज गर्ने प्रतिबद्धता गरेको छ। बेलायत आफूले थेग्न नसकेपछि आप्रवासीहरूलाई अरु देशमा पनि पठाउने गरेको छ। तर, त्यसमा पनि अहिले सत्ता पक्ष र विपक्षीबीच विवाद छ।
लेबर पार्टीले आप्रवासीको स्तर धेरै उच्च रहेको बताउँदै सानो डुङ्गामा अवैध बाटोबाट यात्रा गरी लाभ उठाउने तस्कर तथा अन्य गिरोहहरूमाथि कारबाही गर्ने बताएको छ।
शनिबार जारी गरिएको ‘युगोभ पोल’ले केयर स्टार्मरको नेतृत्वमा रहेको टोरी समूहमा २२ अङ्कको अग्रता दिएको छ। युगोभ एक विश्वव्यापी जनमत सर्भेक्षण र तथ्याङ्क विश्लेषण गर्ने ख्यातिप्राप्त कम्पनी हो।
