मुख्यसचिव शंकरदास बैरागीले सबै मिलेर भ्रष्टाचार नियन्त्रण गर्न जरुरी रहेको बताउनुभएको छ ।
भ्रष्टाचारबिरुद्धको अन्तर्राष्ट्रिय दिवसको अवसरमा आज अख्तियार दुरूपयोग अनुसन्धान आयोगले गरेको कार्यक्रममा उहाँले यस्तो बताउनुभएको हो ।
उहाँले भ्रष्टाचार नियन्त्रणमा भएको प्रगतिले मुलुकको सुशासनको सुचकांकमा समेत सुधार भइ अन्तर्राष्ट्रिय स्तरमा मुलुकको प्रतिष्ठा र छवि उँचो हुने बताउनु भयो । उहाँले सार्वजनिक प्रशासन बेथिति, विसंगति र भ्रष्टाचारजन्य गतिविधि नगरी नागरिक र देशको सेवामा लाग्न आवश्यक रहेको बताउनु भयो ।
मुख्यसचिव बैरागीले सरकारी निकायहरुले कानून र कार्यविधिको व्यवस्था अनिवार्यरुपमा पालना गरी सबै क्षेत्रमा कडाईकासाथ लागू गर्ने कुरामा जोड दिनुभयो । उहाँले भ्रष्टाचारीलाई निरुत्साहन र सदाचारीलाई प्रोत्साहन गर्दै समृद्ध भविष्यको आधारशीला निर्माण गर्नु आजको आवश्यकता भएको बताउनु भयो ।
मुख्यसचिव बैरागीले सबै निकायको तत्परता र सबै निकायको सहकार्यमा मात्रै भ्रष्टाचारलाई नियन्त्रण गर्न सम्भव रहेको उल्लेख गर्दै सार्वजनिक सेवा प्रवाहमा देखिएको विकृति, विसंगति र समस्याको समाधान गर्दै सार्वजनिक सेवालाई चुस्त, सहज, पारदर्शी र नागरिकमैत्री बनाउन आवश्यक रहेको बताउनु भयो ।
