काठमाडौं । नेपाली बजारमा चिनियाँ नागरिकहरुको चासो बढ्दै गएको देखिएको छ । पछिल्ला केही वर्ष यता नेपालमा विजनेश गर्ने भन्दै चिनियाँ नागरिकहरु आउने क्रम बढेको छ ।
परराष्ट्र मन्त्रालयका अनुसार पछिल्लो पाँच वर्षमा करिब ९ हजार चिनियाँ नागरिकले नेपालका लागि बिजनेस भिसा लिएका छन् ।
उद्योग विभागको सिफारिसमा परराष्ट्र मन्त्रालयबाट सन् २०१७ यताको पाँच वर्षमा ८ हजार ८ सय ३९ जना चिनियाँले बिजनेस भिसा लिएका हुन् ।
विभागका महानिर्देशक रामचन्द्र तिवारीका अनुसार नेपालमा विजनेश भिसा लिनेमा चिनियाँ नागरिक सबैभन्दा अगाडी छन् भने चिनियाँपछि कोरियाली, जापानी, अमेरिकी तथा अष्ट्रेलियन र जर्मन नागरिक रहेका छन् ।
सन् २०१७ मा १ हजार ५ सय ७९ , २०१८ मा १ हजार २ सय ८९ , २०१९ मा २ हजार ७ सय १३, २०२० मा १ हजार ३ सय ७४ र २०२१ मा १ हजार ३ सय ४४ चिनियाँ नागरिककले विजनेश भिसा लिएका छन् । चीनबाट भिसा आवेदनकमात्र नभई यो अवधिमा सबैभन्दा बढी लगानी स्वीकृतसमेत भएको छ ।
प्रहरीका अनुसार विजनेश भिसामा आएका कतिपय चिनियाँ नागरिकहरु विभिन्न अपराध संलग्न भएको पाइएको छ । उनिहरुले भिसाको दुरुपयोग गर्दै नेपालमा आफ्नो स्वार्थ पुरा गर्ने काम गरिरहेका छन् ।
