नेपालमा पनि कफीका पारखीहरू धेरै छन् । संसारभर भएकामध्ये कफी सबैभन्दा चर्चित पेय पदार्थ भएको विभिन्न अध्ययनहरूले देखाएका छन् । २०२१ मा विश्वभर कफीको खपत १६५ मिलियन ६० किलोग्राम भन्दा बढी थियो । त्यसमध्ये युरोपियन मुलुक तथा अमेरिकामा कफीको खपत सबैभन्दा बढी छ । कफीका पारखीहरू कफी पिएपछि शरीरमा स्फूर्ति आउने बताउँछन् । उनीहरू बिहान मात्र होइन दिनभरिमा पनि धेरै कफी पिउन मन पराउँछन् ।
अनुसन्धानका अनुसार कफीको अधिक सेवनले केही गम्भीर प्रकारका बिरामी पनि हुनसक्ने देखिएको छ । कफीका कारण मुख्यतः टाइप २ डायबिटिज र फ्याटी लिभर डिजिज तथा केही क्यान्सरलाई समेत सहयोग पु¥याउने देखिएको छ । कफीको अधिक सेवनले आँखाको ज्योति गुम्न सक्नेतर्फ पनि विज्ञहरूले सचेत गराएका छन् ।
‘द मिरर’का अनुसार कफीमा धेरै मात्रामा ‘क्याफिन’ पाइने हुँदा कफी धेरै पिउँदा ‘ग्लूकोमा’ अर्थात मोतियाविन्दु हुनसक्छ । यसको समयमै उपचार गरेन भने आँखाको ज्योति नै गुम्नसक्ने बताइन्छ ।
क्याफिनयुक्त पेय पदार्थले शरीरमा रक्तचापको मात्रा बढाउँछ । जसले गर्दा आँखामा दबाब बढ्छ । यदि कसैको आँखामा लगातार दबाब बढ्दै गएमा मोतियाविन्दु हुनसक्छ । मोतियाविन्दु अन्धोपनको प्रमुख कारण हो ।
दिनमा तीन भन्दा बढी कप कफी पिउँदा ‘एक्सफोलिएशन ग्लूकोमा’को जोखिम बढ्ने गर्दछ । मुख्यतः मोतियाविन्दु शरीरमा तरलको मात्रा अधिक निर्माण भई आँखाको अप्टिक नसामा दबाब बढेपछि हुने गर्दछ । मोतियाविन्दु भने कफि लगायत अन्य कारणले पनि हुनसक्छ ।
विशेषज्ञहरूका अनुसार सामान्य अवस्थामा दैनिक तीन कपसम्म कफी पिउन सकिन्छ । तर, त्यसभन्दा बढी कफी पिउनु स्वास्थ्यका लागि ठीक नहुनसक्छ । सही मात्रामा कफी पिउँदा यसले शरीरमा फाइदा पनि गर्छ । कफीको दानामा ‘क्लोरोजेनिक एसिड’ (सीजीए) पाइन्छ । जुन ‘एण्टी अक्सिडेन्ट’को राम्रो स्रोत हो । जसले रक्तचापलाई कम गर्न र रगतको सञ्चार प्रक्रियालाई सहज बनाउन सहयोग गर्छ ।
